打工仔呻00後「職場巨嬰」難頂過老屎忽 7大行為勁乞人憎！

打工仔呻「職場巨嬰」難頂過老屎忽 7大行為勁黑人憎！

有打工仔近日在網上呻職場近年湧入大批「職場巨嬰」，怒斥「好彩先有幾個知道咩叫禮貌」、有人「識得背書」但「唔識得理解」同「唔識得運用」。文章在網上都引起熱議，更有網民齊齊列出7大難頂「職場巨嬰」的劣行，當中90後，00後佔最多。

1.無禮貌

做人最忌就是沒有禮貌，而正正呢類「職場巨嬰」最多的便是沒有禮貌，連最基本的「唔該」、「多謝」亦都唔識開口講。亦有網民在分享經驗中提及自己去到「經理」位置，在教導新入職同事時，沒有表現出「尊師重道」的意思，事後不但沒有主動講「唔該」更當佢冇到。

2.自認天之驕子

有網民話90後、00後多數為大學甚至是碩士畢業，在學曆及背景影響下，普遍令他們認為自己是「天之驕子」，覺得自己在工作上仲醒目過前輩。有網民指曾聽到有00後同事稱「以前成績考過第一」、「呢間公司收我執到」，對自己相當有自信。

3.不願學習新事物

某些新人在返工時都不會太主動去接觸同學習新事物，認為「學嚟冇用」，亦有網民引述指後生同事曾揚言「我唔識咪唔做囉」、「唔識咪唔識」、「 點解我要問」。

4.態度高高在上

由於很多90後，00後的新人均為獨生仔女，由於家人都當佢哋「王子」、「公主」咁去錫，令他們都不太懂得待人接物，不時態度都「高高在上」，仲有呢類新人曾對住同事大喊「我屋企人從來都未試過咁命令我」，令在場同事都當堂嚇一跳。

5.多數係裙腳仔

因為受到家人的寵幸，所以這類「職場巨嬰」通常都會有裙腳仔性格。有網民分享一則離奇經歷，指一位同事在受到老細「照肺」之後，立即打電話返屋企「報串」，投訴公司老細，仲差啲要見埋家長。

6.做嘢冇主動性

過往的職場打工仔都偏向主動，仲會幫同事或者老細手，但一眾90後，00後就普遍被動，上司落Order先識得做嘢。網民直言「好有性格」、「踢一踢先郁一郁」，又暗嘲他們「好聽話」、「唔叫就唔會做」。

7.工作唔Mark筆記

有時工作上開會或者傾計劃時，唔少人都會選擇以Mark筆記形式去記錄工作內容。但呢類「職場巨嬰」通常都會「得個聽字」，就算在是後會忘記工作內容，但都會選擇不去寫筆記。

網民意見兩極

該文章都引來網民熱議，有網民直言90後，00後在職場上都十分之唔掂，直斥他們「全部都好無禮貌」、「無禮貌係呢一代嘅常態」、「唔識俾面人」；不過亦有網民認為事主都係「老屎忽心態」，將自己放於「高高在上」的心態，更反駁指「你地唔教，下一代咪唔識囉」、「有無諗過係你地態度勁西在先呢？」。