移民英國住邊好？居英港人初步介紹各區天氣、樓價、學校、工作機會與交通配套｜港媽 • 講英
撰文：港媽 • 講英｜圖片：unsplash
好多網友問我，英國咁大，點揀喺邊度落腳？有親戚就話可能會住近啲；如果冇嘅話，唔通聽過曼聯就揀住曼城？以下係小女，一名曾住英國十幾年，回流香港十幾年，再帶大帶細咁回流多次英國嘅師奶仔愚見。
首先，嚟得英國就唔好將香港嗰套搬過嚟。就算住喺Central London（倫敦市中心）嘅Central，都唔好諗住好似香港咁樓下就有大商場駁通地鐵，黑雨都唔怕濕，半夜醒咗都唔餓。英國同香港係兩個唔同嘅地方，有唔同嘅文化、天氣、食物、生活、娛樂環境。
咁好啦，英國天大地大，由最南嘅康瓦爾郡（Cornwall）揸車到最北嘅蘇格蘭（Scotland）邊境都要大概8粒鐘。咁對一啲英國冇朋友、冇親戚、冇留過學、冇旅過行，只係可能弱弱地聽過曼聯係曼城（Manchester），利記係利物浦（Liverpool），Harry Potter喺倫敦（London）撘火車返學，又想揾個治安好、校網好、易揾工、樓價合理、生活方便、綠草如茵、心曠神怡地方嚟落腳嘅朋友嚟講，到底可以點揀？
小女只會大包圍地分享吓英國地區同見解，希望帶出唔同角度嘅觀點畀大家參考，內容絕冇歧視成分。揀地點時，可考慮以下因素：
1. 口音
英國有好多郡（county），而每個郡（county）都有獨特嘅口音。普遍南部嘅英文比較容易明白，北面嘅，例如紐卡素（Newcastle）或利物浦（Liverpool）嘅口音，可能對初到英國嘅港人嚟講，需要多點時間適應；因為除咗口音，仲有好多地道slangs要明白。
2. 天氣
地理常識，北面凍過南面，郊區凍過市區，高山雨水多啲，東面就乾身啲。但整體英國都係又凍又濕，自己衡量吓啦。
3. 鄰居
有普遍印象嘅就係，中部如伯明翰（Birmingham）多印度人，南面如白金漢郡（Buckinghamshire）多有錢人，東北面多chavs（用以指部分具反社會主流傾向的青少年，意帶貶義），曼城（Manchester）多香港人。呢方面都幾影響治安、學校質素同市區配套，建議上網做完資料搜集後親身來感受吓。
4. 住屋環境
同大部分國家一樣，越近首都住屋就越貴。咁當然，就業機會多啲，又多啲娛樂，又近唐人街，多啲家嘅感覺。但大家可以考慮吓，移民英國是否想過返香港嘅大都市生活，定係鄉村啲嘅農場生活，還是城郊啲嘅簡單生活，海邊啲嘅自由生活。我想講嘅係，英國版圖很大，倫敦以外都有好多就業機會，或創業嘅可能，所以都值得跳出框框考慮多方面啲。
樓價方面，普遍南面貴過北面。但有些地區如旅遊區，海邊（英國人對海邊非常瘋狂）或擁特別靚嘅自然景觀，例如英國湖區、科茲窩（Cotswold）等，樓價都會俾本地人搶貴晒。
5. 投資
可留意吓英國政府未來幾年會對邊個城市有重點發展，例如起鐵路、市區更新，有機會提升樓價同優化生活配套。又或想做物業投資嘅，咁可揀就業機會多嘅城市，放租畀年輕專業人士，或附近有出名學府嘅城市，放租畀學生。
6. 就業
最多網友關心嘅一項。一定㗎啦，大城市例如倫敦就最多就業機會。倫敦市中心生活指數好高，好多香港人就揀倫敦外圍，因為生活指數相對低啲，同埋可以入倫敦返工。但其實通勤時間都唔短，來回可長達1.5小時。如果揀2、3線嘅城市就要有心理準備揾錢比香港少，同埋未必係自己做開嗰行。
7. 學校
每個郡（county）都有好好同麻麻嘅學校，可以睇Ofsted report做參考。除非你指定子女必定要入間學校，否則就可以唔使睇得太重。但要留意某啲移民落腳熱門地區（如Barnet、Richmond、St Alban），評定咗為「outstanding」嘅公立學校（State school）都可能超哂額（oversubscribed） 。
8. 交通
考慮有冇直通火車到倫敦，因為如果最壞情況下堅要去倫敦返工，而你唔係住倫敦附近，有直通火車都叫有幫助。冬天落住雨企喺月台上等轉車，之後廣播話火車延遲時，你真係會想跳落去月台算。另外，近國際機場都係一項值得考慮嘅因素，到時要出差又方便啲，去歐洲旅行又平啲。倫敦以外，喺英國最好識揸車，如果唔係你真係會好孤單。英國啲巴士出哂名唔密、唔準時同唔快。
如果真係唔會、唔想、唔識揸車嘅，建議揾地方近火車站、巴士站同超市，咁冬天出街或買餸時冇咁苦。
以上都係小女少少嘅經驗所談、觀察同分享，任何選擇都冇一定嘅對錯。希望可以幫大家係移民英國嘅事上從多啲嘅角度了解多啲。
延伸閱讀：移民純粹為逃離香港？過來人談心態 以BNO移民英國前先考慮這3點 ｜港媽 • 講英
延伸閱讀：移民英國｜一家四口每月生活費只需約港幣1萬元？一星期買餸開支、餐單分享｜港媽 • 講英
延伸閱讀：BNO申請、續領懶人包｜申請步驟、副簽與文件要求 遺失補領要點做？
更多移民相關文章，詳見經一移民局
