貓主哭稱1原因逼於無奈棄養16歲老貓　網民狠斥扮偉大：係唔想使錢喺佢度

貓主用1理由棄養16歲老貓　好心義工急助尋好人家

據Facebook專頁「喵令魚生」所指，有認識貓主的朋友指16歲的貓貓「Kylie」陪伴著主人大半生，但由於其主人指自己於11月29日要移民，「話因為貓貓年紀大，驚坐飛機會出事，所以棄養貓貓」。雖然得知此消息時非常憤怒，但亦未能改變任何人的決定，所以希望盡量幫貓貓找個好人家，安度餘生。

據帖文中所指，貓貓Kylie雖然年紀已經相當大了，但牠的身體狀況仍然相對健康，性格溫馴，親近人類，喜歡被摸摸，包毛巾時可以被修剪指甲。因不想把貓貓送到貓舍，只求有好心人可提供地方安身，求溫飽。

網民大感痛心狠斥主人無人性：祝他朝君體也相同

網民看到貓主棄養原因後，紛紛留言鬧爆無人性又扮偉大，更指「講一堆廢話去合理化自己，根本就係藉口」，毫無責任感。「我家的狗15歲，因病吐血走了，現在想起也心痛！何況養了16年已是老貓，器官機能退化不太能自主，咁都丟棄，主人無人性！」、「已共同生活16年，個主人可以用咁嘅藉口實在太忍心！」、「我會選擇舆牠一起飛！就算真的不幸往彩虹橋！起碼牠知道主人仍愛佢啦！主人呀！不怕會有因果嗎？」、「都唔明點解個個急到好似著草咁，趕住搭最後一班離開香港嘅飛機？貓貓都已經16歲，如果我係擔心佢捱唔到長途機，就一定會等埋佢走咗自己才移民」、「如果大義凜然驚隻貓跟住走會頂唔順，咁移民移遲啲真係會死？希望個主人無兒無女，如果有就祝願他朝君體也相同」。

而有同樣養貓的港人指，「我識嘅家庭係媽媽帶兩個兒女先移民，爸爸留港陪十多歲貓貓終老才同家人𣿬合。都係40多歲的夫婦，小朋友都係10歲以下」、「我隔離屋有個姐姐同兩隻狗，狗狗主人都係返咗外國，雖然唔知咩原因唔帶走狗狗，但主人一路請住姐姐喺香港照顧狗狗，每日都視訊睇狗狗。。。至少負責任，狗狗仲有一個一直照顧佢哋嘅人一起繼續生活⋯⋯貓貓當你哋喺家人，你哋當佢係咩」、「我隻貓都係16歲坐飛機，根本唔關貓貓受唔受到嘅事，係唔想使錢喺佢度」、「我帶住18歲胰腎貓飛都無事，唔好咁多藉口，又唔係醫生講唔飛得」。

義工公布最新情況：已有好心人收留

而在帖文發出數天後，義工今（27日）亦再更新狀況，指「感謝大愛家庭，喺期限之前收養Kylie，我哋剛已將Kylie安全送到新家」。而在帖文中義工亦提到16歲的Kylie其實知道到底發生了什麼事，指「尋晚去原主人屋企接Kylie嘅時候，原主人哭了，看起來也是有難處的，十分不捨，事已成定局，我哋唔方便亦都唔需要再問更多。Kylie好聰明，未拎飛機籠埋身已經開始喊，佢完全知道發生緊咩事，聽到佢叫得咁慘，我哋義工都眼濕濕好心疼佢，去新家路途上，Kylie久唔久都發出幾聲好唔開心嘅叫喊。雖然唔太合適，但我哋見佢咁樣，都忍唔住再問多次主人 會唔會考慮其他辦法，可惜主人都答唔到我哋，於是我哋將Kylie送到新家。」

有新家庭願意接收16歲的Kylie，這個好消息亦令一眾網民安心，指「好人一生平安。 Kylie 你要乖乖繼續健健康康」、「祝小朋友身體健康、大愛家庭感謝你」、「希望香港人要移民都帶走自己隻寵物，佢都係你家人一份子，點解你唔會離棄自己子女，但會離棄寵物？佢哋都係性命，都係家人」、「養寵物係一生一世，棄養好可恥，移民唔代表要放棄寵物，絕對不要棄養！」