舊人薪水低過FG 仲要教佢哋做嘢  網民：有料就跳槽 無料就收聲｜網民熱話

撰文：Smart ED編輯部｜圖片：香港討論區、電視截圖、unsplash

樓主表示完全唔明點解舊人低人工過新人，唔通公司想玩分化？佢唔知應唔應該要求加人工。樓主25歲， fresh grad22歲。全公司35歲以下officer 人工比fresh grad低。

有網民反問樓主，自己有冇諗過點解工作三年仲係16K。表示如果樓主有料，話要離職的老細會話加人工，如果老細冇打算留你，就應該好好反省下。

「唔知樓主工作能力如何，不過有d公司就係咁，只要啲舊員工唔出聲當無事發生，要到人地話走先加人工。」

唔少人都覺得樓主應該要走，公司唔會可憐佢人工低過FG，公司出得較高人工俾FG，都好明顯係睇樓主唔順眼。

樓主應該要搵過份工啦，現時公司擺明恰佢唔敢走，出嚟做嘢都係睇錢，新人高過舊人擺到明係逼你走。如果依一刻樓主仲唔出去搵offer，繼續留低只會等於話俾公司知你冇能力。

「走啦！擺明公司覺得你唔適合呢份工。何必自取其辱？
你問左，唔得。又唔走…… 迫人表明你係垃圾做乜啫？」

「有料就換工，冇料就安安份份做，抱怨係冇用」

如果樓主真的覺得咁不爽的話，網民建議佢可以一句大叫：人地17k，沒有資格要教的，佢教番我就差不多

不過亦有網民覺得公司冇做錯。從管理學嘅角度，就算你好做得嘢一頂二或三，都是低過新入職的，就算你因此而走，公司更不會留你，寧願請個二萬幾人工頂你個位。

有唔少公司諗住員工年零兩年都會走，但你唔走，公司賺左。請新人，自然要用市場價。網民提到有統計顯示，每三至四年离開公司轉工加薪會係最好，魚唔過塘唔肥。

有人問到樓主，當有新人墊你底時，升職機會會唔會大咗。

另有網民估計會唔會係其他人見工時開價進取，而公司其實個 budget 係許可。但樓主見工時，叫價太低。站喺公司立場， 就會照你個叫價請你。樓主絕對有權同老細爭取，老細亦有權睇你值唔值得加，就係咁簡單。

有人表示先要諗「人哋乜嘢大學你乜嘢大學先」。有相同經驗者表示自己以前份工都係咁，因為學歷比較低。連嗰啲新人都要帶，而且佢地做唔掂的嘢要我幫佢地做埋。

「你有冇大學畢業証書先??????冇就唔好埋怨啦。
好似我個同事做左8年都係搵15k炸，咁咪仲慘?????」

過來人表示，老闆不會對舊人加新，等於大婆永遠最辛苦，甜頭最少。請人會提高薪金，因為請唔到人，等同二奶永遠福利最好。魚唔過塘不會肥，是真的。朋友上星期才轉工，多了$5000加雙糧，但當然要睇運。

另人有經驗者表示，好多公司管理層都係行呢套， Assume 人工係 strictly confidential 冇人知， 就相對對舊人唔係咁公平。
請新人係以市場價，又唔代表佢地認為你唔得，但就一定唔係 key staff or potential staff，有良心既, annual review 會加番俾你， 衰既，唔出聲照舊加4-5%俾你就算。

佢提到如果樓主有自信嘅，要走佢地就一定會 adjust 留你，如果你真係連 fresh grad 都不如，就由你走，某程度上公司係需要有自然流失，特別係做幾年都冇太大進步既員工。