Facebook專員月薪10,000起標
廣告
早前我哋就報導過話，越嚟越多名人、公司出錢請個Facebook專員返嚟幫自己理好個Page，表表者就有兩位田少同樹根啦，有啲人工仲誇啦啦，有成四萬一個月，你哋都咪話睇少呢行既發展潛力呀！
撰文：趙晶晶
自問玩Facebook好叻既你，見到待遇咁優厚係咪好想入行呢？所以經一就為你深入地…查詢過資深業內人士，到底你哋呢班有為青年點先入到行、入到行又要做啲咩，同埋最緊要既係：有無得升職呀？
專做社交媒體營銷既CMRS Group董事Barry Lau就話，呢行主要係幫客戶係社交平台上做策劃、支援既角色，所以請人時通常會測試下求職者既溝通同表達技巧、創意，同埋最緊要既，就係你有無留意開Facebook同其他社交媒體、對呢行有無熱誠。學歷方面，求職者要係大學畢業，如果有讀過同社交媒體有關既課程會優先。
Barry話，一般新畢業同學起薪都係一萬蚊左右，並認為呢個起薪點係未來唔會有太大改變，換言之未必會追上一般數碼營銷員既水平。但係高層嚟講又唔同講法喇，如果你升到上Director而你既表現又夠突出既話，分分鐘可以追上一般廣告業高層既水平：太約60至100萬年薪，仲可能有額外奬金添！不過加唔加人工、升唔升職喺呢一行嚟講都好睇個人表現，即係你越滿足到僱主，你就可以要求越多咁話喎。
但求職者都有一點要注意架！就係社交媒體營銷既轉行空間比一般既傳媒廣告界狹窄，所以要諗真啲自己係咪真係有興趣先好做呀！
