90後教師邊有長假期 咪又要改簿備課帶活動

做住TA先

八九十年代教育業急速發展，令到當時湧現咗大量嘅常位教席，當時畢業嘅準教師都唔憂無工做，因為需求高過供應。但係依家教育界都飽和咗，好多獲得常位合約嘅都會做到退休年齡先走，令到個市場換血嘅速度極慢，基本上常位教席接近飽和。呢啲一個個手持學士學位兼教育文憑、甚至碩士學歷嘅準教師都要被逼簽待遇差極遠嘅合約制教師，甚至「做住TA先」，真係少啲意志都捱唔住。

以前教師跟住學生咁一年放足90日暑假同一系列假期，只有特別勤力嘅教師先會放假都自願開工備課。但依家已經無得自唔自願，因為實在太多嘢做，你放假唔做就跟本應付唔到，啲假大部份都係變相要在家工作。點解我哋咁多嘢做？因為學生都越嚟越多試要考，特別係嗰個TSA，為咗校譽，高層會畀好大壓力教師，但對於老屎忽，佢根本唔驚畀人炒又點會同你賣命吖，咁咪要啲新教師食哂。另外家長要求高咗、學生壓力大咗、學生情緒問題又多咗，有啲良心嘅，又要諗吓點樣唔好令學生再更加辛苦之餘又追到進度，咁就結果要自己工餘時間準備定多啲方法令佢哋上堂專心啲又入腦啲。

有時又一個唔小心觀察到啲學生之間有拗撬，又忍唔住要花時間關心了解吓，但你哋都知道，老師要喺學生口中問出個由來係需要花啲時間，亦唔係一份短時間嘅工作。同埋有啲社工成日唔記得咗自己係唔可以爆學生同佢哋講嘅嘢，見你做阿小明嘅班主任，就第一時間走嚟同我講我嗰班呀小明點點點，自己就當已經follow up咗個case，但其實咪又即係拋咗個波畀我，仲要我有咩變化第一時間話返畀佢知。

工作卸落新教師度

上文講過老屎忽嘅工作態度九成九都係輕輕鬆鬆等退休，呢班人成日本住自己做得耐，又一句「食鹽多過你食米」，就將自己嘅工作卸落新教師度。有時真係唔怪得啲學生會喺呢啲老師背後打佢哋小人，又叫人有唔識就問，問多兩樣又嫌人煩叫佢去問第二個教師，呢啲情況通常就發生喺由細到大讀書都好叻嘅老屎忽身上，佢哋根本唔明點解人哋唔識，自己求其講過就算數。

而老屎忽同學生之間嘅矛盾通常係特別多。有一次，有個老屎忽喺走廊大大聲鬧一個同我相熟嘅學生，本身我想掂行掂過算數無謂插手啦。點知，佢拖埋我落水。

「阿X sir，你嚟評吓理嘞，我請佢食曲奇，佢擰轉身就掉咗佢，咁無禮貌！啱唔啱啊？」

個學生又唔出聲，成件事得佢講，我點評啫…… 結果佢罰咗個學生留堂。

後尾個學生自己嚟同我講，其實係因為佢見到Miss K畀塊餅佢之前，隻手捽完腳指無洗手，但佢行埋嚟遞塊餅畀自己又唔敢唔接，所以先諗住靜雞雞掉咗佢，點知畀佢見到……

呢啲咁嘅情況，你叫我點安慰個學生呢？我都唔知可以點樣教佢下次處理得好啲，無論我講乜，一旦傳咗出去，我都兩邊不是人。唉……

所以你話，教師係筍工咩，唔係，極其量只係一份穩定嘅工……