2016年每月炒股路線圖

其實每年股市總有一些傳統的時令當炒股，在這個變化萬千的股市當中，今年當炒機會又有幾高？

1月

宜炒: 農業股

每年一月，都是農業股當炒的日子，因每年年初，中央都會公布「一號文件」，呢份文件過去12年都係以農業為主題，所以年年農業股都被炒起。

近期化肥股已經蠢蠢欲動，投資者亦可留意第一拖拉機(00038)，呢隻股過去12年有八年的1月高位較開市價升逾10%，其中2006至2008年，及2010年，1月最高升更介乎26%至31%，投資者唔好走寶。

宜炒：高息股

1月尾美國聯邦儲備局又舉行議息會議，不過12月先剛剛加完息，相信1月唔會有所動作。雖然通脹正在放緩，但人民幣又同時貶值，資金冇出路，所以高息股應繼續有捧場客。

2月

宜: 濠賭股

2月又農曆新年，以往每逢大時大節，濠賭股必定例炒，皆因唔少人會趁假期過大海碰碰運氣。雖然濠賭股舊年賭收大幅下跌，不過啱啱的12月，澳門博彩毛收入跌幅由以往跌三成，收窄至跌21%。好多券商預期博彩收入會見底，近兩日開始又唱好濠賭股，到2月實在有機會炒翻轉。

忌: 收租股

除濠賭股外，農曆新年前例炒的股份一般還有收租股，皆因好多人要添年貨。不過香港消費市道轉弱，現在到處到叫減租，濠賭股今年炒起機會極微，列入不宜沾手類。

3月

宜: 環保股

2016年政協及人大會議已分別定於3月3日及5日在北京召開。每逢「兩會」，唔洗問阿貴，一定是環保跑出。你睇現在北京霧霾幾咁嚴重，所以就算經濟放緩，環保一定要推，實唔實行到就係後話。

所以，風電、太陽能、水力發電、新能源汽車呀，趁2月底3月初入定貨就啱啦。

忌: 高息股、地產股

市場普遍預料美國2016年全年共加息1厘，自2015年12月加息後，下一次最大加息機會為3月，屆時高息股及地產股，如港鐵(0066)、領展房產基金(0823)，都有機會震一震，要小心。

5月

大事不宜

這個月份傳統例炒「Sell in May」，雖然並每年都會發生，但傳媒例會吹噓一翻，唔係都講都係。2008至2015年，八年間只係得2009及2014年係5月上升，其餘年份「Sell in May」都認驗。今年又話大陸及香港經濟轉差，大家都係守一守好。

6月

宜：體育用品股、啤酒零食股

2016年世界體壇盛事多籮籮，6-7月有歐國盃外圍賽，8月有巴西里約熱內盧奧運，兩件皆是全球觸目的體壇大事，相信會帶動相關的體育股，如安踏體育(02020)、特步國際(01368)，尤其是內地體育用品股去庫存有道，舊年走勢唔錯，相信今年或者可以乘勢破頂。

另外，睇波睇奧運，點少得飲啤酒、食零食。以往這些賽事都會順道炒作啤酒及零食股，華潤創業(00291)、康師傅(00322)、中國旺旺(00151)、CEC國際(00759)都可以留意留意。

忌：歐洲概念股

英國首相卡梅倫早前承諾連任後，在2017年底前舉行脫歐公投，外界預料公投有機會提前於今年6月舉行。

英國調查機構「YouGov」去年9月的民調顯示，40%英國人希望脫離歐盟，而希望留在歐盟的則佔38%。若英國退出歐盟，或會觸發歐盟成員國間極大動盪，特別是受惠於英國領導的北歐國家，有機會令弱不禁風的歐洲經濟雪上加霜。德國財長朔伊布勒警告，若歐盟失去英國這個擁有國際金融中心的成員國，將是「大災難」。

如此看來， 英國脫歐結果定會成為左右歐洲資金的流動，匯市更會有所震動。相信與歐洲經濟相關的股份，例如滙豐控股(00005)、思捷環球(00330)等，都會乘機CHOK一CHOK。

7-8月

宜：航運股

年底是銷售旺季，工廠都會將貨提前數個月付運，以趕聖誕的零售黃金檔期。因此，每年第三季開始，都是炒作航運股的時機。舊年四大航運股因為炒重組停牌，所以股價不能作準，但睇返前幾年，每逢下半年都有炒作，橫掂航運股估值咁平，買少少博炒無妨。

9月

宜: 內房、汽車股

內地有「金九銀十」的傳統季節，唔知點解，內地人鍾意係9月及10月兩個月買樓、買車。所以呢兩個月亦係炒內房其汽車股的時候。唔到你唔信，舊年汽車股如吉利汽車(00175)及東風集團股份(00489)，係9月及10月兩個月來個大反彈，股價分別升39%及44%，2014年一樣有升。大家可在8月尾入定貨，到價高起時就沽售。

內房的炒作冇汽車咁犀利，但都有升。小編睇兩隻龍頭股中國海外(00688)及華潤置地(01109)，舊年9月及10月都有彈，但冇汽車股咁強。而且望返前幾年，有時9月都唔升，似乎汽車股較為當炒。

忌: 地產股

美國另一次加息高峰期在9月，而香港雖然水頭足，但當美國不斷咁加，香港遲早都會跟加息。依家市場普遍預期香港最快會係9月加息，如果真係，高息股及地產股又要捱沽了，而呢次下跌，應該比3月那次更金。

10月

大事不宜

10月又被市場視為傳統股災月，雖然小編統計過，10月跌市其實唔係好多，但一跌都係跌鑊金，好似過去數次大股災，如1987、1997及2008年的十月份都有較大跌幅。都係好似之前5月策略咁，今年大陸及香港經濟轉差下，都係宜守不宜攻。

11-12月

宜：美國消費股

美國大選在11月8日舉行，白宮易主會影響到現行經濟政策，市場憧憬大選前，候選人為爭取選票，會推出利好經濟的政策，再加上美國經濟亦逐步復甦，有助刺激家居用品需求。相信受惠美國經濟復甦的股份如敏華控股(01999)以創科實業(00669)，屆時都會炒一轉，投資者可以在10月尾入定貨。

宜：內地網購股

內地方面，11月是一年一度的光棍節，阿里巴巴網購紀錄年年創新高，而12月則是聖誕消費黃金檔期，一些網購概念股如騰訊控股(00700)、國美電器(00493)、做網購物流的海爾電器(01169)都有機會炒作。

此外，國家主席習近平強調關注互聯網安全，「互聯網+」會繼續成為內地未來發展大方向，在剛過去的12月中央經濟工作會議，便一再重申此點，料明年亦會一樣繼續推行，進一步造就科網股炒作空間。除騰訊外、中國擎天軟件(1297)、金山軟件(3888)、金蝶國際(268)等股份亦可留意。