2015 財經大事回顧

美國加息由年頭開始講，整個投資市場都睇美國聯儲局頭，結果要到年尾12月最後一次議息會議，聯儲局才決定加息0.25厘，預計明年會加息1厘，歷時七年的超低息週期正式結束。

雖然香港銀行未有跟隨加息，話銀行結餘大把水，起碼要到明年第三季先加。不過，香港業主一聽加息就腳軟，二手樓在10月已經出現劈價，中原城市領先指數9月創146.92歷史新高後已調頭回落，近期跌勢更急，12月13日已跌至137.3，重返今年3月初水平。

不過成交就繼續冰封，2015年二手買賣登記至今暫只有約3.4萬宗，如果年底未見改善，全年二手交投量可能少過2003年沙士期間既3.5萬宗，創12年新低。

2.新盤「細」界

之前地產商不斷推中價豪宅，市民難以上車，搞到政府要推限呎樓的政策。點知，在今時今日樓價離地咁高的情況下，限呎已不合時宜，因為發展商推出蚊型劏房豪宅，真係仲細過限呎樓。

小編閒閒地數到幾個劏房盤，恒基地產（00012）大角咀「利奧坊曉岸」最細開放式戶172呎；九龍建業（00034）紅磡「環海‧東岸」開放式單位約200呎；遠東發展（00035）黃大仙鑽嶺最細開放式單位面積唔夠200呎，當然唔少得誠哥的大埔嵐山II期，最細165呎。

反而今年推出的全港首個限呎盤世宙，最細單位有420呎。係今時今日，真係一啲都唔細。

3.細價股爆炒 漢能市值一度超越港交所

今年4月全城以為牛市重臨，就連細價股亦現爆炒潮，仙股幾近絕跡之餘，漢能薄膜發電（00566）更因為係「滬港通」內地投資者交易量最高個別股之一，所以股價由去年8月至今年5月19日，股價幾乎飆升左5倍，市值逾3,000億港元，市值更超越港交所(00388)、中國石油天然氣(00857)等多隻大藍籌，主席李河君身家暴漲。

不過，漢能在5月20日股價突然急挫47%，遭香港證監會停牌，被質疑經營及資金狀況，市值蒸發逾千億元。據消息人士透露，漢能一直尋求復牌，但由於拒絕向港交所提供母企漢能集團帳目，短期內都復牌無望。咁都得，真係希望你冇蟹貨在手。

4.人民幣暴力貶值 入完SDR再跌過

人民銀行8月11日透過調整中間價，令人民幣匯率暴跌超過3%，創1994年最大單日跌幅。本港1萬億元人幣存款，一日賬面損失左326億港元。小編嚇到心都離一離，仲有一千幾百蚊人仔係手嗌哂救命，話口未完，I.T（00999）原來手持11.87億元人民幣存款，翌日兌換成港元，匯兌預料蝕約6,000萬港元。

之後人行要托市穩定匯率，原來係要鋪路年尾入特別提款權(SDR)。最後如願得償，國際貨幣基金組織(IMF)於11月9日宣布，人民幣將於明年10月1日正式納入SDR貨幣籃子內，權重達10.9%，高過日圓和英鎊。之但係「入籃」之後，人行再無托市，人仔又繼續跌，到昨日為止已跌5.1%，創四年半新低。唉~~~~~ 小編個啲人仔，都係淘寶洗左佢算啦。

5.A股股災 中央暴力托市

A股上半年喪升，上海證券綜合指數一度高見升過5,000點，表現全球最牛。中央為怕股市過熱，5月開始要管制「兩融」，點知好心做壞事，就咁就斷左A股牛市，更爆發股災，上證綜指跌回接近3,000點水平，A股由全球最牛變最熊。

A股亦拖累港股於7月8日單日曾跌逾2,138點，成為史上最大單日跌幅，唔少股民當災，走都走唔切。

中央為救市，無所不用其極，21家券商同中證監推出救市措施，包括注資至少1,200億元人民幣托市、承諾上證指數低於4500點時「只買不賣」、暫緩新股上市以保留市場資金等。仲有唔少A股自行停牌，係7月9日就有約1,500家公司停牌，佔A股總數約2,800隻逾一半。中央下令「不準賣」及停牌呢兩單，嚇親唔少券商同中國大媽，全球就當笑話咁睇。

6.長實世紀重組 電能合併失敗

超人李嘉誠畀《人民日報》話撤資，佢就一於少理，繼續做生意，長和系仲大搞世紀重組，集中資金繼續到海外併購。

其中長實同和黃將合併成為兩間公司，名為長和（00001）及長實地產（01113）。長和接手非地產業務，注入和黃核心電訊及港口業務，取代長實上市地位，而長地就負責房地產業務。長實以1:1比例換取長和股份，而和黃以1股換取0.684股長和股份，合併後和黃除牌，成為歷史。

不過，長江基建（01038）同電能實業（00006）就無咁順利，最終因電能股東高票反對，合併計劃宣告失敗。所以話，有得真投票幾重要。

7.商品熊市 渣打跌穿海嘯價

今年商品市場跌得金，美元強勢加上中國經濟轉弱，對商品需求下降，全球商品市場都經歷寒冬。

國際油價不斷創新低，紐約期油近期跌至每桶34.3美元水平，幾乎重返金融海嘯約32美元的低位。國際金價亦曾跌穿每盎司1,050美元支持，國際銅價亦跌至每噸4,500美元，亦是2009年3月以來低位。

不過商品未算最衰，渣打集團(02888)今年先跌得勁，因為業績走樣兼要供股，股價今年12月曾跌至56.8元歷史低位，仲低過海嘯價。由今年高位123.67元計，已經跌左54%，較2013年逾200元高位，更加跌超過七成。唔知曾經為滙豐控股(00005)低見33元時流過眼淚的青姐胡孟青，見到渣打咁的表現，會唔會再喊呢？

8.說好的深港通？

人民銀行11月3日上晝發表行長周小川文章，刺激當日上午股市升逾700點。點知同日下晝就急急腳澄清話篇文係摘自5月講話，叫大家唔好咁認真喎，個市就掉頭回落，下次講都唔知信唔信好。港交所（00388）總裁李小加就係11月18日講到明年內唔會推出。不過咁，「滬港通」通左車一年，反應就麻麻啦，「深港通」唔知有冇咩突破呢？

不如大家聽下隻歌鬆一鬆好過啦：http://www.edigest.hk/Vip/detail?id=1651

9.希債玩嘢 製造危機

歐債危機沒完沒了，希臘做咗多年債仔，愈欠愈多，今年6月仲還唔到錢，搞到銀行要關門，股市停市，民不聊生。

希臘和歐洲各國談判，要希臘繼續緊縮先發放緊急資金還款，點誰希臘遲遲未肯與債權人達成共識，仲話要搞公投，全民投票睇下是否讚成緊縮，搞到全球股市震一震，以為希臘會被踢出歐元區，掀起另一波違約危機。最後？希臘咪又係乖乖答應晒債權人條件，繼續獲得資金還債，一切無發生過咁，一場鬧劇就咁過咗。

10.自由行褪色 鋪王也劈租

自從一週一行實施，街上大媽少咗，被喼轆到腳的機會亦少咗，不過連啲名店都拍蚊，紛紛撤離，今年就有COACH中環店率先退租。

其他零售地段都不斷劈租，下下三成、四成咁劈，就連鋪王命運都一樣。曾經係全球最貴舖租地段既銅鑼灣羅素街8號，英皇鐘錶珠寶中心地下3號同5號舖，本來由英皇鐘錶珠寶（00887）每月以276萬元租用，之後卓悅（00653）以160萬元承租，劈租四成。唔知之後如果劈租潮持續，小店有冇機會突圍而出呢？

【伸延閱讀】2014年十大頂隱財經大事回顧
http://www.edigest.hk/Finance/newsdetail?id=22110