東張西望｜7兄弟姐妹爭遺產爭出火！五弟獨霸100萬：阿媽安排！
7兄弟姐妹為爭遺產鬧上《東張西望》 五弟獨霸100萬：老竇我都唔認！
連婆婆一家共有9口，除了96歲丈夫連伯外，還有5仔2女，共7子女。而連婆婆早前因病離世，五仔阿輝隨即就被兄弟姐妹發現他獨自拿走媽媽全部遺產，總值100萬元。六哥和七妹伙同《東張》主持林映輝打電話給五仔阿輝了解事件，豈料阿輝一聽電話便指「我唔想叫佢（爸爸）啦，我同佢哋已經10幾20年無見，都唔想叫任何一個姓連嘅人，老竇我都唔認」！此時七妹激動地指「係你用咩語氣同呀媽講，你係咪好等錢使，我已經同你講過好多次你要將100萬話畀我知，點解你值得拎」。而五仔阿輝一直都大叫「小姐！小姐！」，並無回答問題。
五弟聯絡《東張》為自己平反 哭訴：阿媽話我日後好淒涼
電話中不停大聲呼喝的五弟，後來主動聯絡《東張》做訪問，並帶主持到一屋邨商場受訪。五弟阿輝指媽媽早於8月15日跟他見過面，並把一個「重要訊息」交托給他，指「我有嚿錢畀你，係好大嚿，你唔好話畀任何人知，包括你老婆，係得我同你知，唔好講比任何一個人知，你發誓啦」。而阿輝聽到媽媽的話後，亦即場發誓，指「會將呢個秘密帶入棺材」。
他續指，媽媽7日後催促他到附近銀行，二人到銀行辦聯名戶口過數，而自己全程只站在一邊，沒有說過任何一句說話，並指有CCTV做證。阿輝指，自己當初都有問媽媽「真係要咁做嗎」，並且向媽媽提到逐個兄弟姐妹，對話如下：
輝：「大仔咁點？」
媽：「佢個女都大學畢業啦，唔使理啦」
輝：「二女呢？」
媽：「佢有3個仔，仲使咩理」
輝：「三仔呢？」
媽：「佢有積蓄啦，有仔有女，唔驚」
輝：「四仔呢？」
媽：「佢個女都買咗樓，驚咩」
輝：「六仔呢？」
媽：「佢無睇過我，算啦」
輝：「七女呢？」
媽：「佢個仔讀大學，又有政府資助，有綜援」。
然而，阿輝開始講到流淚，指「阿媽同我講，我無細路，全家人又同你唔啱，你外家又靠唔到⋯⋯你日後⋯⋯好淒涼」，說到此，他不停「索鼻」啜泣。
輝仔追問阿輝：咁你會唔會睇在爸爸份上拎錢出嚟？
主持繼續追問，當中提及到年老爸爸和兄弟情，問道「會唔會因為呢份情而拎返100萬出嚟」。阿輝聽罷，即表示「NO！NO！」，續道「12年唔傾偈，唔好話係家人，我唔接受，咩姓我唔願提，我老竇我都係叫老人家，你唔好搞我唔會拎100萬出嚟」。他指爸媽關係一直不恩愛，最好分開住，媽媽曾向他稱「我有錢無人知，我想去老人院住，無人搵到我」。而講到兄弟情，阿輝指早在6年前都已斷絕，事關當年做裝修的細哥稱幫他租舖做生意，月租$6,000。「我唔知佢哋諗咩，我話我唔願意落去，佢地話幫我，叫我落去我咪去，但要還嘅。你話好，我覺得唔好」。
更指兄弟做裝修，自己就只是做窗簾地毯，「成日都話我係同隔離夾份開舖，咁我點啊？捉住佢哋嘈啊？我同佢哋嘈交都會嘈到入醫院」。另外，他又指有封信被兄弟姐妹「周街貼」，貼足7日，而媽媽當時見到就會「周街撕」。但由於全家人都認同兄弟姐妹所為，自己等同「無Say」，「我唔知點解成家認同，佢哋有啲嘢作出嚟，或者未經證實就賴落我到」。
被質疑醫院只去過一次 五仔：我一早同呀媽講咗
而主持提到，阿輝由媽媽入院後只去過一次，靈堂也只是短暫逗留，阿輝指「我一早同阿媽講過就算佢走，我都唔嚟，啲人好惡」，而媽媽當時表示「得㗎啦」。而到訪問最後，他堅稱「如果有一句大話，我天打雷劈，死無葬身之地，最好係植物人」。
兄弟姐妹：完全係歪曲事實！
五仔阿輝的一番話，令兄弟姐妹相當激動，指「根本大話連篇，歪曲事實，錢係用嚟醫阿爸，佢去醫院嗰日，係過咗數先去睇阿媽，確定阿媽講唔到嘢」。至於貼街招，細哥指根本沒有見過。「只係劃清界線，因為佢（五仔）做生意收人錢收得好誇張，個客同我講點解做2個插蘇收$1,400幾，我平時做1個都只係$200幾」。而到最後，兩兄妹更指「就算無一百萬，我哋都會合力養到爸爸終老，呢個係做仔責任，傍都90幾歲，仲有幾耐見」。而96歲的連伯提起子女關係時，都忍不住流淚。
網民：個仔演技幾好喎
網民看到訪問後，紛紛留言指「個不孝子好明顯做戲」！大部份人稱「五仔，心盲了，這樣對待父母，時晨未到，日後你一定會後悔的」、「聽完個仔講嘢真係好演技，睇佢嘅對答超級混亂就知佢講緊大話， 仲有自己諗咗就當真嗰種人，不過無法啦，呢個仔嚟攞債都無計㗎喇，財到光棍手，認命吧」、「相信連婆婆最初不會真的想把一百萬全給五子，應該是期間聽了五子的一些說話，糊里糊塗地和他開了聯名。連婆婆也91，頭腦不清晰也不出奇」、「邊講邊作假到呢…有個咁嘅反骨細佬反骨仔真係家門不幸。不過亦有人指「其實到阿媽死咗其他仔女先知阿媽有一百萬， 就知根本唔親， 反而五仔就知道， 仲有阿媽根本就唔想留返畀佢老公」。
