點解雙併要加錢? 經濟學原來有解釋
圖片來源：新傳媒資料室
「香港夜繽紛」活動啟動，K11 與星光大道響應在尖沙咀舉辦「星光夜市」，但市集中小食店「香料案內所」燒賣成為網絡焦點 。店方除了以20元4粒價錢出售燒賣，亦以雙拼燒賣數量同樣是4粒，卻以25元出售，比單拼魚肉或豬肉燒賣貴5元。有人於是在其IG向店方查詢「咁點解雙拼（燒賣）貴5蚊？」，「香料案內所」則霸氣回覆：「多謝你嘅問題。平時你去米線舖，係咪都會問一樣嘅問題？」
（圖片來源：網絡圖片）
檔主回應有人反對，有人支持。支持的人認為「大部份燒味店雙拼都會加價，本來就好正常，經濟學都有解釋呢種情況」、「邊際需求遞減定律」、「Econ（經濟）有教」。
今次我們用以下例子講講
一碗單併麵要27蚊 雙併何解要30蚊
碗麵嚟到，雲吞2粒，水餃2粒，心諗正啦，但原來單併又係得4粒。一碗單併麵要27蚊，雙併何解要30蚊? 明明份量無變，如果兩個人食，各叫一碗單併麵再交換，都可以做到雙併效果，點解一個人叫「雙併」要貴D先? 公平咩???!!
雙併份量無多到，不同的是選擇多咗，為滿足自己同時食到兩種食物的時候，你只好揀「雙併」，就係呢一點，就比老闆看穿了你，要你畀多D錢先得。
經濟學：邊際效用遞減定律
呢個情況可用經濟學的「邊際效用遞減定律」(Law of Diminishing Marginal Utility)來解釋。
當每樣事物的數量上升時，邊際價值則會有所遞減。譬如說，你食第一粒雲吞會有10個開心，即是最開心，食第二粒可能會得番8個開心，第三粒就有6個開心，如此類推，直到食到開心係零為止，即是不再感到開心。
而「雙併」就係將兩種食物放埋一齊，食第一粒雲吞會有10個開心，食第二粒水餃就有9.5個開心，比食「單併」的第二粒雲吞而得的8個開心高。
所以，一碗麵應該以一個購買計劃來看，每粒雲吞和水餃都應拆開來計算，「雙併」的數量雖然沒變，但「雙併」的總價值(Total use value)提高了。你想吃兩種食物的期望大於吃一種食物，因此，你願意付出「更多」去買到更多開心。
不過世事邊有咁簡單，實際啲好，加錢喎，唔係個個願意加錢要多樣餸，正如凍飲加3蚊你都要諗諗啦。
加錢對顧客來說等於增加成本，當成本太高，需求便會下降，有多麼正的貨品都唔會賣得出。所以加幅必需符合需求，否則只會嚇走顧客。一旦超出合理需求或顧客心理關口，加價後都只得好少人揀「雙併」。「雙併」尤如老闆和顧客之間的博奕，加幾多錢就是不斷試水溫，從無一個確實指標。
雙併賣的不是成本 而是享受
換個角度看，對於老闆來說，「雙併」的成本其實沒有改變，一碗雲吞河27蚊，一碗水餃麵都係27蚊，每碗同樣有4粒雲吞或水餃，「雙併」同樣又是4粒，唔會因「雙併」而要付出多了。所以，「雙併」賣的不是成本，而是享受。(假設每粒雲吞和水餃的成本相同)
咁你又會話我約朋友一齊去食，叫單併再Share黎食，價錢又平啲，又可以滿足食兩樣餸的享受。不過，你首先要搵到兩個人一齊去，而且你朋友要肯同你Share先得。
食碗麵之嘛，竟然可以講到咁多野。食飽了，係時候叫嘢飲，「熱鴛鴦呀，唔該」……咪住! 點解飲鴛鴦又唔洗加錢呢？公平咩?!!!!
