驚買唔返 3個情況 賣樓會後悔
筆者： 「價錢靚唔靚？」
朋友： 「都幾靚架！」
筆者： 「咁點解唔賣呢？」
朋友： 「老婆話驚遲啲仲貴，驚賣咗買唔番。」
筆者： 「咁你覺得呢？」
朋友： 「好多專家都話，有樓唔好賣！搞到我十五十六。」
筆者： 「有冇得加按呀？」
朋友： 「借爆晒啦！」
筆者： 「唔賣冇得轉喎，揸住呢幾層樓仔收租過世咩？」
朋友： 「咁又係…」
筆者： 「暑假旺季就過啦，個價咁靚唔賣，唔好後悔喎。」
朋友： 「咁有信心？」
筆者： 「睇部署啫…我今年賣咗幾間，換晒貨，你自己諗啦！」
樓市跌的時候，個個都唔敢買。
樓市升的時候，個個都唔敢賣。
奇怪！唔係應該跌時平買，升時貴賣咩？
該賣不賣，亦有代價！
分享一次深刻經歷…2015年中，樓市同樣熾熱，同樣創新高。
筆者原本打算將其中兩個單位放售套現，同時釋放部份借貸額，如同往年的策略，在暑假旺季期間開出高價，其中一個開價$480萬，目標價$460萬，底價$450萬。呎價$1.45萬，當時樓下分層同樣大細的單位，成交價約$1.1萬。由於是連天台特色戶，即使開價偏高，仍有不少買家睇樓還價，最高還到$438萬，距離心目中底價少$12萬，看見樓市仍然火熱，心想…遲啲賣價錢仲靚，於是就好有型咁拒絕收票！另一個單位劇情亦差不多…
後來樓市逆轉，想賣已經賣唔到！
2015年第四季，氣氛急轉彎，全城唱淡，甚麼剛性需求、供不應求霎時之間全部唔見晒！莫講話賣，直頭搵個人睇都難，即使有人還價都還得好唔俾面，$428萬、$400萬、$388萬…我不如繼續收租啦！於是唯有將單位再放多一個租約，等待下次機會。2016年第二季，樓市反彈，到了年底，已差不多完全收復失地，筆者終於以兩年前的底價約$450萬沽出單位，呎價、總價至今仍然是該樓盤最高。
看似賣多$10多萬，其實損失了機會！
有睇筆者專欄，或者有睇TVB「有樓萬事足」的朋友都知道，2016年初全城唱淡的時候，筆者高呼樓價見底，今年唔買勢必後悔！身邊唔少專家、朋友當我癲咗，筆者唔理得咁多，叫身邊的同學、朋友出去撈底，其中有幾個個案，分別在電視、新書分享過，不贅。當時筆者因為未賣樓，冇資金，冇貸款額，有得睇，冇得食！如果賣出這兩個單位，可以套現$700萬，以當時的形勢，可以低價買返兩、三個更當炒的單位收租，當時叫同學買的幾個屋苑，個個單位都升百幾萬，計一計數，隨時賺少$400萬、$500萬！
賬面上，冇輸到！持貨多年半，收多年半租，賣貴10多萬。
實際上，蝕機會！賺少$400萬、$500萬！新辣招下想買都冇得買。
以往政策沒那麼緊，即使賣不出，亦可以用加按、再買、收租、再加按、再買、再收租…的模式不斷累積資產，但政府不斷加辣、收緊按揭，還出了一招第二套房15%印花稅，以往這招不靈了！今時今日，要在房地產市場賺錢，一定要勤力啲，走多幾轉。
當然亦有朋友很擔心，如果睇錯市，賣咗買唔返點算。
第一，這多少要講眼光，確實有機會賣出單位之後樓價再升，所以自住樓就唔好搏啦。
第二，即使你有幾層樓，賣出之後受制於第二套房15%印花稅，亦未必買得番，要考慮清楚，之前有篇專欄分享過，有幾種樓該賣，自己衡量吓啦。
第三，最重要！考慮自己有沒有其他投資門路，對沖沽出物業的風險，如果沒有就要慎重考慮，筆者唔怕賣咗買唔番，最主要因為有工廈、大陸樓等，作為後盾，讓資金不斷流轉，比住宅賺得更多，不怕！你呢？
作者為1%投資培訓中心課程總監，教授物業投資、上車及裝修等課程。暢銷書《上車又住又賺》及《樓轉命運》作者，網誌《第一桶金》總瀏覽逾300萬人次，並曾擔任TVB《有樓萬事足》顧問。
Fan Page《第一桶金》： www.facebook.com/anthony.wealth
