騎呢有價 新股獨特業務逐隻數

其實近幾年，香港都有不少「概念獨特」新股，大家一聽業務後，第一時間反應都係：「乜呢啲都可以上市既咩？」雖然業務獨特得來帶點騎呢，但原來好多投資者都好受落，好多時首日掛牌都會爆升。之但係能否繼續維持，就要睇「造化」啦。

康寧醫院（02120）：搵瘋人錢

估唔到做精神科醫院可以集團式經營，仲由溫州起家，一直擴大至其他省市，依家就話有九家醫療機構，未來仲話會繼續擴充版圖。依家香港貧富懸殊咁犀利，好多人為層樓人都癲，內地貧富懸殊仲犀利過香港，想唔生意好都唔得啦。

難怪呢隻股招股咁多人追捧，公開發售已經超額認購124.3倍，首日掛牌收報49.1元，較上市價高38.7元高近兩成七，今日仲繼續升，真係唔好可以睇少瘋人的市場潛力！

富貴生命（01438）及福壽園(01448)：搵死人錢

提到「獨特」，一定要數賺「死人」錢的殯儀股。回想2009年中國生命(08296)透過配股上市，首日已爆升44%，其後四日最高更見4.24元，較配售價0.72元升近5倍，令人覺得「死人」財易發。

而事實上，2013年上市的福壽園，表現都唔差，首日上市同樣有44%升幅，雖然之後跌足一年，今年3月跌到3元先見底，但依家唔覺唔覺又爬返上黎5元水平，埋單計仍然較招股價高五成，算對得住死守的投資者。

唔知係咪殯儀股上左幾隻之後，已經失去獨特性，去年底上市的富貴生命就唔多掂，當時招股價3元，點知朝早就低開，首日掛牌已經跌咗三成。之後仲一直跌，直到而家都仲未返到家鄉，真係同股唔同命。

Magnum （前身為02080，現已賣殼予奧克斯國際）：搵蒲友錢

「獨特」概念唔少得經營夜場的Magnum。此股去年上市，由於港股市場從未有過夜店股，好多投資者又認為夜店酒水生意毛利驚人，所以大受歡迎，當時超額認購成3,558倍，中籤率得嗰1%，上市首日都大升近九成。

可惜Magnum上市不久業績極速走樣，發「盈警」之後，股價即刻暴瀉至唔夠1元，仲低過招股價1.5元。早幾個月仲賣埋殼，真係仇都冇得報。

中國派對文化 （01532）及華夏動漫 (01566)：搵宅男錢

呢隻股睇名以為又係夜店股，但原來係賣cosplay用品，包括假髮及服飾，還有非cosplay的性感內衣，擺明車馬搵宅男錢。估唔到咁都可以做到上市，真係世界之大，無其不有！咁佢表現如何？

呢隻股上個月上市，首日已經低開一成，但第二日突然抽升逾兩成，以為有金執？點知只係曇花一現，升咗一個禮拜之後就慢慢跌，今日仍未止跌，繼續創上市新低，完美示範何謂下降軌。

另一隻華夏動漫，就主打動漫衍生產品，即係賣下動漫產品及搞下主題樂園，仲會自己創做動漫角色添。呢隻股就非常有市場啦，3月上市後，股價一度升至12.5元高位，較招股價3.65元大升2.4倍，雖然之後回返落6元，但依家又唔覺唔覺升返上7元以上，較招股價仍升逾倍，宅男市場都唔細架。

BBI生命科學（01035）：搵高科技錢

呢間生命科技，老老實實小編而家都未知係做乜。佢地集團自稱研究多種生命科學產品嘅開發、製造及銷售，當中有DNA合成產品、基因工程服務、生命科學研究耗材、蛋白質及抗體產品及服務。

咁即係咩？係咪即係基因改做食物，或者係人工受孕？真係殊小編見識淺。唔知買佢地股票嘅人知唔知佢地係搞乜嘅呢？有投資佢地公司嘅讀者可以話畀小編知！因為小編發現佢竟然好難得冇暴跌，大時代嗰陣仲爆上過，去年底上市到依家，股價累升接近五成。唔通真係騎呢都有市場？