馬鞍山屯門藍田深水埗 買樓先揀地區 邊區好住
馬鞍山呢個地方你可能好少去，因為睇睇個地圖都知地方隔涉，有啲朋友直頭覺得嚟一次馬鞍山好似去咗個旅行咁。但呢幾年馬鞍山都愈嚟愈多新盤落成，你可能未嚟過，但不能排除你可能會搬入嚟！作為山民，我不得不告訴你呢個地方鳥語花香以外嘅一面！
位置隔涉
好似之前有人話，自己住馬鞍山但去中環返工，日日要轉五程車，來回時間差唔多三四個鐘咁，馬鞍山屬於香港嘅邊緣地區之一，來往旺角、銅鑼灣等鬧市都要起碼預返個幾兩個鐘車程，如果係住山上屋苑或者烏溪沙近西貢嘅村屋就再需要加多一程小巴或者接駁巴士，出入都幾講毅力。
物價貴選擇少
馬鞍山以高級住宅區為主，圍住市中心嘅都係私人樓，依家興建中嘅都只有私人樓，加上近年區內嘅主要兩個商場都轉型做中高檔次，本身嘅P字頭超級市場都跟住轉型做高檔啲嘅T字頭超市，加上MP字頭都進駐咗呢區，拉高物價。
馬鞍山本來就有「美食沙漠」之稱，居民投訴區內食肆只有又貴又唔好食嘅連鎖店令市民無得揀。
就算想自己煮都唔平得去邊，因為近年屋邨商場頻頻被開刀，有近日裝修中街市嘅小商戶曾經表示要加租130%先可以再落戶喺裝修後嘅街市，相信日後商戶嘅租金成本都不得不轉嫁到客人身上。
海景畀貴樓遮哂
馬鞍山近十年都不斷起新樓，本來大部份居屋、私樓都可以共享吐露港海景，但亦因為起嚟起多新樓落成嘅關係，海景遮吓遮吓就遮剩樓景。
加上新樓一棟高過一棟，除咗遮咗海景仲遮埋個天，屏風效應越嚟越顯著，喺區內住咗幾十年嘅居民都大嘆依家區內比以往焗促很多。
雖然馬鞍山有個烏溪沙天然沙灘，但其實呢個沙灘係有得睇無得游，因為無康文署嘅救生設備。
另外呢個海灘因為多咗個海之心石堆，因此吸引咗越嚟越多人嚟「朝聖」、打卡，仲有一部分係遊客，而部分缺乏環保意識嘅遊人又唔帶走自己帶嚟嘅垃圾，甚或成日掉啲嘢落海，令沙灘近年嘅衛生情況越嚟越差。
加上有啲遊人見到個石堆，個個都走嚟砌埋一份，影響沙灘生態，早前就有中學生投訴個個嚟左砌右砌搞到啲石一岩一忽，無咗石灘部分嘅天然美。
住市區又如何 九龍東老化區人的閉翳
有時見到啲人會分享下住屯門、天水圍嘅各種辛酸，突然有感而發。所謂「區區有本難念的經」，住藍田都有住藍田嘅心聲。
藍田佬心聲:長電梯真係好閉翳
我人住藍田，人已經到左「佬年」。男人老狗總會有弱點，我都唔例外，而畏高就係我最大弱點!
自從旺角朗豪坊長電梯發生左恐怖意外之後，令到本身有「世界級畏高恐懼症」嘅我每次搭電梯個陣更加淆底，驚死會出事咁。搭親都會心都慌埋，腳又震晒。唔好問我男人老狗點解克服唔到，畏高呢個係心理病嚟，我都搞唔掂!
雖然藍田有港鐵站，交通算好方便，但對於有畏高嘅我，次次搭港鐵返藍田都一定要經過兩條長命電梯先係攞你命3000! 無錯!係兩條!驚一次都未夠，要打孖嚟先慘。
落都無事，但上真係搞唔掂! 朋友知我有搭電梯恐懼症，一上親長電梯就要好肉緊咁捉住個扶手，成個人都硬晒、唔敢亂郁。上緊電梯個陣一定唔可以比人掂自己或者搭膊頭，其他嘅身體接觸都唔得，如果唔係就會精神緊張。試過有朋友趁我唔為意時搖一搖我，個下真係汗都滴埋……
電梯年紀大機械壞
藍田站其實有4個出入口，其中A出口因為連接好多個屋苑同埋商場，所以使用率最高。簡單啲講，大部分藍田居民都係靠A出口嘅扶手電梯上落藍田站，如果咁岩撞正有電梯維修，就會全人類塞爆藍田A出口。
我明扶手電梯用得耐有故障唔出奇，我真係明喎! 試過因為電梯有故障，得返一條運作正常，所以只準上唔準落。問題係唔經A出口扶手電梯落，就要「行個大運」先搭到港鐵，本身5分鐘路程，就會變左至少15分鐘先得。之前仲試過放工繁忙時間撞正電梯故障，全部藍田人迫喺A出口「打晒蛇餅」，真係躁底兼灰左! 本身返工都已經攰到死，放工仲要迫到死，佬表示都係想返個屋企啫。
人地話「誰明浪子心」，計我話又有誰明藍田佬嘅心呢又? 岩岩先搭完唔知攞你命幾多千嘅長命電梯返黎，每日一搭一嚇真係命都短幾年，都係出返去聽下王傑啲歌定定驚先!
屯門90後心聲 住屯門要夠堅忍先至得
唔好再問屯門人屯門係咪有牛呢啲老套問題! 聽到都反晒白眼……如果好想睇牛，去大嶼山或者幫到你。住左喺屯門都有二十幾年，配套都算充足，不過屯門係「隔涉」呢個係真。
屯門公路塞車塞到傻
記得嗰陣返學要日日晨早流流爬起身返學真係不得了，因為唔想坐轉車轉到傻嘅西鐵，但要過海所以必經屯門公路。但次次去到屯門公路都會塞到爆，只會見到好長嘅車龍。
就算早左出門口都無用，繁忙時間都係會塞車，塞車同迫車已經變成左習慣。撞正落雨或者有交通意外，就只有塞上加塞，架車行極都未走得出屯門公路。
仲記得屯門冬天得返兩、三度時，只係feel到咩叫孤單、寂寞、凍……
無啦啦比人歧視
如果平時有上開Facebook，一定會知之前有個Post係叫僱主請人時要小心屯門90後。個Post話自己阿媽係做HR，話咩屯門90後係「次等」。
吓!? 咩邏輯嚟? 又所謂總結左住屯門嘅某啲特徵，例如覺得我地與世隔絕、基層、求穩不上進乜乜乜。住屯門就要比俾人標籤同人身攻擊，無啦啦躺著也中槍!真係火都嚟!而家住屯門啫，使唔使俾人講到一錢不值先!
搭車返歸要好耐
次次約friend行街食飯，無論去邊都好，都至少要粒幾鐘先返到屋企，但friend點都係會快過自己。當自己仲迫緊巴士嗰陣，啲friend就涼都沖埋準備上床大覺瞓。呢個時候自己就惟有唱下首富士山下:「歸家需要幾里路，誰能預算？」
呢啲心酸，如果你係屯門人，你懂我的……
深水埗
說起深水埗，你的滿腦海或只有：雜！亂！窮！
踏出深水埗地鐵站，映入眼簾的人形形色色；街道兩旁的攤檔擺著、掛著大大小小的廉價品；攤檔中間本不寬敞的路，車照駛過；若你敏感，偶爾還會聞到身邊轉瞬即逝的鹹酸味。
無可否認，這些確是這裡的一部分印記。驟看，彷如一個黑白世界，難以令人嚮往。
香港人，普遍有種特別的心理：喜歡累鬥累。看到別人過得比自己慘，外在表情展現憐憫，內裡卻隱隱升起快感。
若你期望繼續讀到住深水埗的人有幾咁慘？那麼要說聲抱歉了。
因為，若要繼續說下去，我更願分享它有色彩的另一部分印記。從一個居住3個月的新人瞳孔。
舊區的年輕文藝氣息
(攝影：K.K.）
回想第一次對深水埗改觀，是緣於大南街上的一間咖啡店，和它周邊的皮革店。心裡不禁為這瀰漫文藝氣息的舊區一角興奮驚呼！
往咖啡店裡窺探，被它的live music和年輕人齊聚分享的氣氛吸引；再看看周遭的皮革店門外，偶有張貼著受年輕人歡迎的「體驗工作坊」海報⋯⋯
老社區滋長了文化藝術，既新又舊、既離地又貼地。我們眼裡的傳統舊區，正淡雅地悄然變身，變得更有趣雅緻。
廉價勞力的不廉價人格
搬屋無電梯，層層皆是錢。深水埗有個不成文的「習俗」，找人搬家居，少數族裔是首選。
起先「不信邪」，硬是請地道港人搬。豈料搬了上樓，明明說好一件沙發四百大元，卻被這兩名本地大漢一把搶去五百大鈔和為他們準備的檸檬茶，揮手就走，還邊走邊說：「這是你應份的！」無奈弱女子一名，只好硬食⋯⋯
第二次再搬，「信邪」了。機緣巧合找來兩名少數族裔，三件極重的大型家具卻只需六百。看著他們身水身汗地細心保護每件家具，回想上次一件沙發也要四百，於心不忍，最後便支付多二百。
豈料，收到的是兩名少數族裔雙手合十、謙卑的感恩和真誠的祝福！他們是內心色彩豐富的一群。那幅忠厚老實的模樣，讓人恨不得把所有錢都掏出！
（可惜沒有父幹可靠的Fresh Grad表示能力有限~）
衣食住行用都極之方便
這裡真的包羅萬有，像油畫般色彩繽紛。
衣：若非要乜brand乜brand，以及沒有特別品味追求的話：長沙灣道的「賣衫一條街」、西九龍中心同街邊攤檔，隨手便可有收穫，而且老少咸宜。有閒情逸致的，甚至可以去基隆街的「布藝一條街」揀塊靚布自己車！
食：近年湧現不少深水埗「掃街」覓食的報導。的確，這裡遍佈的食店出名「平、靚、正」又方便，深夜忽然想食個夜宵，落個街就有；街市、菜檔鄰近，便價新鮮生果蔬菜都應有盡有。去多幾次，令攤檔靚姐認得你，話唔定可以拎多兩顆蔥走，keke~
住：佈置家居，最頭痛的是突然醒起呢度要整個架、嗰度要加塊板⋯⋯鑽牆入釘配匙，轉角便是的五金鋪幫到你；忽然用完罐洗潔精、想臨時換塊新布，梗有間日用品店在你身邊。
行：中心帶，地鐵沿線、交通便利，去屯門、觀塘都無難度。（只是地鐵站人多了些些⋯⋯）
用：不見了唯一一條充電線？去鴨寮街，任你選。簡直是大頭蝦的天堂！
有煙火氣的地方
清晨，「10蚊三份！10蚊三份！行過路過唔好錯過！」伴隨著拖車聲、此起彼落的店鋪開閘聲。
傍晚，「5蚊三份！5蚊三份！清貨大便賣啦喂」伴隨著人群擾攘聲、隔壁燒肉舖的「斬料」聲。
夜晚10點後，北河街街市附近會有夜市。伴隨著點點收音機聲、人群的竊竊私語。
生活的煙火氣，生生不息，是這裡努力經營自己生活的人所烹調出的。
很喜歡《草媒》李惟怡對深水埗的勾畫：
這裡沒有簡單的是非黑白，沒有鮮明的好人壞人，也沒有清晰的楚河漢界。
如是，這裡有一個普通的世界。
繼我話：
細看，這似黑白的世界，同樣色彩斑斕。
