【書展2019】書展用$1,200買上位秘笈 一打開睇 我就後悔了｜Purple弟弟｜網民熱話

撰文：Purple弟弟｜ 圖片：unsplash

筆者最初都只係放工無地方想去，打算入書展消磨時間，順道了解會場嘅人流情況。一入會場，已經發現到處都是人山人海，好不容易才迫入一個傳統出版商的攤位，眼見個個讀者都拎住啲成功法則，股票必勝秘笈等書籍，我都毫不輸蝕，隨手拎起本成功秘笈就睇。

由於筆者進場嘅時候已經係放工後，再加上又要回家食晚飯，眼見每本成功法則睇落好似幾有大道理，筆者就決定買哂返屋企慢慢睇。埋單嗰陣見到要$1,200，我仲心諗學到成功嘅話咁都算抵。一返到屋企食完飯，我就已經後悔了。眼看本本書嘅封面睇落去各有不同，但睇耐啲就會發現內容大致上都係似有還無，睇咗好似無睇咁。

有啲書會係文中係咁引述名人例子，又或者係社會學理論等等，睇完就好似上咗個大學Social Science雞精班咁，去考Semester Final都可能有用，但係同成功發達又有咩關係？  買咗果幾本書返嚟之後，我不斷係咁諗究竟呢幾本書嘅價值係邊，點解攤位入便大部分人都會睇呢啲書，兼且會買返屋企。我思前想後咗一陣，個原因可能只係因為我見到佢哋睇緊，所以我又睇。

香港一直流傳緊一種風氣，舉凡我哋見到人哋做啲乜，我們就會下意識地照抄，每每見到有人考試中加紙，大家總會有衝動要「照抄」；眼見別人子女考到好成績，一眾虎爸虎媽們就會要求自己子女「照抄」。亦正是呢種香港人特有嘅人性的弱點，一眾商家以至出版商先會加以利用，令我哋消費。

早前係新聞見到香港人為買特別版潮服，不惜通宵排隊甚至大打出手，都係沿於人有我有嘅迷思；虎爸虎媽衝入書展「豪購」課外練習，都可能係因為見隔離陳師奶有買俾個女做。諗咗一陣，我都係覺得將嗰$1,200買多幾本寫真好過，起碼有啲靚相睇吓，無咁肉痛。