香港人去旅行似足打仗咁　10大搭飛機慘痛經歷惹共鳴：慘過搭巴士

港人去日本旅行「十足十打仗」　網民數10大經歷斥「搭飛機慘過搭巴士」

帖主之所以有此言論，皆因自己「儲落」的親身經歷。帖主在文中指特別由日本航點往返香港的香港航空公司，總會發生「Overhead Compartment 之戰」，更大數10大場景。帖主續言「搭巴士頂唔順都可以中途落車，搭空中巴士對住呢班鬼客玩吓手都三幾個鐘，仲無得上落，真係疲勞轟炸嚟」。以下為十大經歷場面：

1. 一個細路或老人然後有N個同行照顧者，條隊就快長過正常隊

2. ⁠某公司綠卡會員排專貴counter

3. ⁠一個人背囊手袋仔（或上機喼）再左右手一袋嘢

4. Overhead Compartment首先放嘢既人：「我啲生果／零食／戰利品唔壓得」

5. ⁠行李永遠只識打橫放去霸最大空間

6. 「空姐/空少可唔可以幫我擺，我唔夠力放上去」

7. ⁠同客講英文扮唔識、講普通話無反應、再用廣東話講就西住面話：「我識聽啊」

8. ⁠話份餐唔好食但永遠要打卡，食得好快再問有無多杯雪糕

9. ⁠飛機嘅細路過度活躍，然後父母一係大聲教仔，一係放任唔理；然後手抱BB就喊足全程，有時心諗幾個月大未識行嘅BB去東京究竟有乜記憶？

10. ⁠上機/落機一味向前衝，驚死行尾俾喪屍食咁

逾600留言激讚講得好：見到香港人就驚！

帖主言論一出，旋即引來不少人的共鳴，更有網民指「見到香港人就驚」，指自己發現新攻略避開以上情況，特別是日本的航班，稱「比較鐘意坐NH860，因為係香港人最最最最最最唔鐘意嘅夜晚到。搭咁多次，冇一次失望過，高質好多」、「所以而家我盡可能都商務艙，或者揀少香港人用的航班」、「我唔搭香港嘅航空就係唔想似打仗，腎上腺素飆升，我去旅行要relax，所以只搭日本航空公司」。

而另一邊廂，非常讚同帖主的網民指「詳列得很好，準確」、「好似走難咁，搭飛機要考牌， 餓狗搶X咁」、「只有一個背囊跟身上機嘅我表示，次次都要等空姐幫我搵位擺袋」、「全部都有聲有畫面」、「有啲人離譜到hand carry霸晒成格，心諗點做到…」、「飛機一泊好，個個就起身拎行李然後罰企」、「第4我都遇見過，我擺個背囊上去，個阿嬸喝住，話唔可以擺，佢啲士多啤梨唔壓得，我咪搵空姐，問係咪唔擺得嘢，空姐笑住答可以擺，我照擺。咁巴閉，攬住嚟坐啦」。