關公災難 港鐵最金

日前，小豬喺內地公開話：「不用分那麼細，因為我們都是中國人。」呢句說話火速啟動「一句點燃網民大賽」，一眾網民秒速Unlike小豬面書。更加有熱心網民製作dislike counter，實時報like，以免大家撳爛F5。

小豬面書中午收市前跌勢加快，失守2,400,000點心理關口，收市報2,371,577。其經理人今日中午發聲明希望大家讓表演歸表演，政治歸政治。唯跌勢未止，受花生價格影響，預料趺勢將持續一段時間。

個人公關災難雖然都唔係好事，但比起公司層面嘅公關災難，真係小毛見大毛，你望吓港鐵。

上年9月中網上瘋傳一名攜帶古箏女學生被港鐵職員阻止入閘，事件擾攘近一個月，仲演變成公關災難。其後港鐵公布為攜帶樂器者設立登記制度，但就完全得不到網民支持，佢哋仲形容港鐵係遲來嘅「跪低」。

自樂器風波起，港鐵公關災難可謂源源不絕，公司形象就好似最近恒指一樣，持續插水。

(圖片來源﹕MTR Facebook)

Facebook比賽公關災難

上年年尾，港鐵就搞咗個《港鐵防罪案‧乘客你要識》有獎問答遊戲，參加者只要答啱問題就有機會得獎。表面普通嘅遊戲，其實暗藏公關災難。原本已經想搭很難嘅港鐵，年年加價又經常故障，仲有大量水貨客嘅港鐵曲線引爆一眾網民小宇宙，紛紛於港鐵面書留下創意答案，盡訴心中情。

(圖片來源﹕MTR Facebook)

保護動物公關災難

可惜，港鐵似乎唔多生性，上星期又出事喇。是咁的，港鐵最近於東鐵綫太和站路軌附近加裝圍欄，希望避免動物進入路軌範圍，保護佢哋咁話。

不過有動物義工指出，有貓受困於欄內。雖然港鐵強調會跟既定處理程序同派員巡查，仲喺官方fb發出貼文解釋事件，但依然得唔到網民原諒，繼續瘋狂洗港鐵版。

雖然，真正影響港鐵股價都係要數高鐵超支嘅特別息，上年年尾一度令股價低見34.9元。不過咁，要成功搞好間公司，除咗賺錢，形象都好重要，商譽既嘢，價值可大可小，唔是的話就好似「中國的會爆炸」咁囉。