全港5大最差返工地點！第一名仲慘過返機場 數碼港一個鐘先出到市區

網民嚴選最痛苦返工地點TOP5
返機場都未係最差？返呢區遲到搭的士都無用

5. 數碼港

網民形容數碼港除了景靚之外，便一無是處，指地方偏僻遠到好似去旅行咁，而且無啖好食，無嘢好行。有網民指如果7點放工的話是沒有可能一小時內出返市區。「數碼港肯定係最偏僻，由堅尼地城出發都要有排先兜到入去，而且無嘢好食」，不過網民亦表示「有海景view同埋空氣好」。

4. 大埔工業邨

有網民指大埔本身已經唔就腳，而大埔工業邨是一個唔就腳的偏遠地區。因為無地鐵接駁，巴士少、小巴班次疏，放飯亦無啖好食，想食好啲就要行20分鐘落富善先有好嘢食，非常之唔就腳，難怪曾被網民稱是「狗也不X的返工地點」。

3. 將軍澳工業邨

而將軍澳工業邨亦被指是孤島，與世隔絕，網民表示在將軍澳工業邨上下班一定要靠公司接駁巴士，交通不方便。「環保大道塞、將軍澳隧道塞、龍翔道、觀塘繞道、屯門公路全部塞」。而且近垃圾堆填區、經常有臭味傳出，同樣是無啖好食，方圓十里都無餐廳，只得員工飯堂，如果想食好少少便要行到日出康城，但都要行15至20分鐘。

2. 機場

聽到機場9成人都會覺得遠，雖然很多時都可以一程車便到達，不過返得機場預咗要24小時輪班，交通時間又長，車費又貴，仲要無嘢好食。有網民稱做機場三跑更誇張，指如果走了一班船便不用上班或返屋企。

1. 觀塘

觀塘雖然交通方便，但塞車情況嚴重，經常日夜都塞車，如果遲到搭的士都係無用，因為一樣塞到暈！更有人笑指觀塘返工的塞車時間可以夠讀一個學位。而且因為觀塘人流集中的關係，放飯時間搵位食飯亦有困難，而且空氣差，好天曬落雨淋，有人指一到下班時間觀塘區的打工仔就好似上演真人版的「大遷徙」，人流超密集。