貨幣貶值 邊個股市升最多？

其實，貶值又有咩好怕喎，過去嘅經驗話俾我地知，貨幣貶值，個市唔單止唔跌，反而升得仲多。睇返過去咁多次各國貨幣貶值嘅時候，個大市都係欣欣向榮，升幅十分之大，好似日本咁，日圓由2012年9月開始貶值，一直貶到而家，日經指數期間就升左127%咁多!

其他國家如英國、德國、美國等，貨幣貶值後個市通通上升，升幅由5%至三成不等。

再睇返人民幣，真係估佢唔到，雖然人仔呢三日前無啦啦插水，但其實人仔跌已經唔係呢一、兩日嘅事。自2014年初起，美元兌人民幣匯價由接近6算開始回落，不過個市上海綜合證券指數由當時至今都升左95%，如果用5月最高位去計，更最少升1.5倍。

但話說回來，大家都知大陸股市係在去年中先開始升，當中以今年初升得最急，主要是因為中央「放水」令A股升到失控所致，未必關人仔貶值事。但睇返上述國家表現之後，大家對於後市會唔會放心啲呢？