貧窮線下點過活？

小編左慳右慳計咗條數，如果有骨氣唔靠綜援，唔住公屋，衣食住行都真係勉強維持到生命，呢3,501元究竟要點洗呢？

衣
天氣開始凍，點都要添衣禦寒！冇錢？唔緊要，去社區中心拿取禦寒衣物，又可以慳一筆！

食
早餐：生命麵包一袋十幾片，約20元，每朝食兩片，食足一個月都只係80元，抵！

午餐：基本每日食一隻蛋、一碗飯。每隻蛋2元，一個月要約60元，米飯大約60元。另外菜、瓜約10元斤，1個月食50元。一餐半餐食下肉，都要約50元架啦！加加埋埋就220元啦！

晚餐：晚餐通常會豐富啲，絕對冇問題啊！最主要食芽菜、豆卜、豆腐等各款豆類製品，夠唒營養！每晚5元，經常唔同款，一個月都係140元。加上米飯60元，再食蔬菜50元，間唔中食下肉50元，咁就300元啦！

飲品：政府好多公園、運動場都有水機，可以用水樽裝滿慢慢享用，免費！

住
講到住，小編最頭痕， 好少少的劏房都4,000元起錶，貧窮線之下的人一定住唔起。咁唯有租個只得床位的劏房啦，雖然環境惡劣，但勝在有瓦遮頭，咁就用咗
2,500元。如果都仲嫌貴，唔怕凍既可以考慮住係天橋底，又或者去24小時快餐店瞓，就1毫子都唔洗付出。

行
冇錢就唔可以慳腳骨力啦，一於去邊都行，可能要行耐少少，當做下運動，反正唔洗錢！

如果要返工唔想咁遲，就搭港鐵，不過搭去附近好啦，最盡四、五個站，仲唔可以搭過海，一程6元，一個月就差唔多350元。

沖涼的話，去康文署的體育館，1個仙都唔洗俾，仲有熱水供應，好抵！

雜項
電話係必需品，但記得每個月買50元電話卡就好啦，夠平！上網都係必需，一於去公共圖書館上到夠，上幾耐都係免費！

計計埋埋各樣衣食住行，加埋係3,500元，生存到之餘，每個月仲可以有1元儲蓄。政府官員幻想的貧窮生活，唔知係咪咁呢？