談情都要有飯食 你住劏房我點嫁你

唔好又講埋啲咩好多人發咗達都好慳，人哋係有得揀架！但如果我跟咗個劏房仔，我仲有得揀咩？如果對方住劏房之餘仲只係打份文員工，可以話就咁就一世，同佢發展，除非覺得捱係無問題，或者你以前真係不嬲窮到褲穿窿，覺得有瓦遮頭已經好好，又或者，你係啲乳臭未乾嘅死o靚妹只求唔洗返屋企，如果唔係，我諗一般女仔，都無理由揀個劏房男掛。

生活不平衡

需要用嘅嘢都唔夠位擺，更何況想買啲自己鍾意嘅嘢？話哂都女仔嚟，都想可以買多幾套衫有得換吓咁，但劏房一眼睇哂咁大，仲要住兩個人，你點慳位都好難可以正常生活啦。平時話Work Life Balance，「Life」入面個享受應該包括可以適量地買自己想買嘅嘢奬勵自己，但都唔夠位擺，點life啫！唔好話去旅行要就住就住唔可以買嘢返嚟，連旅行個喼都唔知放唔放到屋企！

家不成家仲影衰自己外家

唔好話我要麵包唔要愛情，講真你住公屋又好租村屋又好，呢啲個麵包都唔方大啦，但起碼好過劏房，因為個地方真係畀到你一個家架！但劏房得咩？想轉個身都難，個廚房又分分鐘係廁所隔離，夾硬住入去都只會家不成家，磨擦一定好多。而且生活得一啲尊嚴都無，你都唔好意思同人講你住邊啦，特別係對住啲mean開嘅親戚朋友，唔止自己羞家，仲會搞到爸爸媽媽都畀人笑架！

拖累下一代同你捱

住得劏房嘅男人多數都係得過且過型，有幾可會畀你遇到個係卧薪嘗膽緊吖，同劏房男可以談到啲咩將來？好話唔好聽，我肯同你捱劏房，咁將來嘅小朋友呢？一生出嚟就要佢受苦呀？定係因為住劏房而決定唔生，用養一個細路嘅18年時嚟儲起供書教學嘅400萬，咁退休咪買到啲山卡啦咁遠嘅樓囉，係咪？

不過一樣米養百樣人，或者唔係個個女仔都好似我咁實際嘅。但唔該一眾劏房男，除非你哋有哂目標要發奮圖強，如果唔係，唔該溝女溝得審慎啲睇吓人哋係咪肯同你捱，無謂害人啦。