被改名為「香港寬帶」　大陸財經譯名笑死你

熟知內地文化的人，都知道很多名詞都是由英文直譯過來，Boardband是其中之一，因為英文Board可譯作寬闊，Band可解作腰帶、皮帶，兩字加起來便是寬帶。雖然大家文化不同，但應該也無需將人地的公司名都改吧。

其實內地仲有好多好好笑的英文直譯的財經譯名，睇下大家知幾多。

熔斷機制

今年初投資者成日聽到「熔斷機制」，如果唔係A股在短短四日就「熔斷」咗兩日，相信好多人單聽個名，都仲係一頭霧水，唔知係乜。

其實美國都有類似制度，但英文就叫Circuit Breaker，即係大家好熟悉的斷路器，當電壓太大就會自己燒左條熔絲(fuse)。不過內地就單係攞熔絲的「熔」，再加上斷路器的「斷」，就造成咗「熔斷」，唔講真係以為同燒焊有關。

如果大陸將熔斷機制改為「緩衝機制」，又或者簡單啲叫停市機制，唔係易明好多咩？

供給側

近一年大家成日聽到中央要「供給側」改革，咩嚟架？圖則黎？供給要打側？

原來呢個名取經自supply-side，即係中央未來著重供應層面的改革，例如控制傳統產業的過剩產能，提升新興產業的競爭力。除咗「供給側」，坊間仲有「需求側」，即係demand-side。

又係嗰句，點解唔簡單啲，就咁叫「供應面」、「供給層面」改革，唔通加個「側」字會洋化啲？效果會大啲？

奧特萊斯

講起大陸譯法崇洋，呢個詞彙就真係無敵。在中資股年報裏，不難發現有「奧特萊斯」呢個字眼。

小編幾年前睇到，仲以為自己見識少，有新事物都唔知。但對照返英文年報譯本，一睇，當堂笑到碌地，原來係「outlets」咁解，將「奧特萊斯」用普通話讀一次，大家會即刻明哂。其實outlets字典入面有解特賣場，點解要用音譯呢？如果要咁譯法，車係咪要改叫「卡」，雜誌要叫「麥格仙」？

移動端

講到英文直譯中文，最多出現的就係互聯網呢個板塊。其實小編幾年前初初睇科網年報，真係唔係好慣，「移動端」？咩黎？咩端會郁咁巴閉？原來移動係英文的mobile，端就係裝置，即係手提電話、平板電腦等等。

小編好多年前畀上師訓話，話街上面周圍郁的東西，叫流動XX，好似流動廁所，流動水車等等，所以初期的手提電話，亦要叫流動電話。直至中國移動(00941)出現，「移動」裝置呢個名稱愈來愈普及，依家仲索性唔叫裝置，叫「移動端」，不過依家港人潛移默化之下，都慣了。

線上到線下

仲有好多奇怪譯名如「線上到線下」，開電視又聽到，財務報表又見到，開頭聽的確聽到一頭霧水，原來呢個喺Online-to-offline (O2O)，如果譯作「線上到離線」，或索性意譯「網上到實體」，相信會更易明白呢個詞彙的意思。