【經一專欄】看葉德嫻拍片後有感 香港人已劣質到要提醒先識做乘客

撰文：Purple弟弟 ｜ 圖片：影片截圖、unsplash

香港人 天生有種反叛

唔知大家有冇留意，人天生有種反叛同好奇心，你愈係唔想俾我知我就愈要去搞清楚。

又或者啊媽叫我飲完湯先沖涼，我就死都沖咗涼先係唔聽，就算合理都要唱下反調。

其實呢類心理特質係大部人都有嘅，當時包括香港人。

日本地鐵取消廣播反而更好

係好耐之前，日本同香港一樣，地鐵站內都會日日廣播住唔好衝門、扶手電梯要點點點啊，成效完全無好轉。

好笑嘅係取消咗反而又好咗，你話係咪好神奇。

就算你份人平時幾無禮貌，去到日本都會「阿尼卡多」前「阿尼卡多」後，因為當地人都會做好自己，自然可以感染身邊人做好行為，咁做咪最有成效囉！

所以講到尾呢類廣告或者片段除咗圍爐取下暖，大家一齊話：「係啊我最憎呢啲人，好有共嗚啊」，共嗚過後真係會有幫助？

職場上老細一樣鍾意訂規矩

好啦入正題，點解我會用好乘客同地鐵廣播例子做引入點呢，因為其實呢類行為大部分都係屬於「common sense」。

當一個社會日日提醒，甚至大肆褒獎一件本身你就應做嘅行為，真係好極都有限。

但好多老細唔明呢個道理，計員工打卡時數計到分毫不差，LUNCH時間一遲就俾說話你聽。

作為員工守時係應做行為，員工無做到只有兩個原因，一嚟就係佢哋自身操守同工作態度問題，二來就係公司太苛刻。

再簡單啲講，做唔做都係員工自己作主，你訂規矩威嚇都只係暫時止血！

就好似個廣告咁，呢兩日HIT完，下個星期又會有巴士或地鐵中港大戰片段上傳！

所以教育先係治本，營造良好工作環境先係上策。

所以，老細們，規矩係要有，但連呢啲基本嘢都要威逼利誘先做好就真係要反省下。

規矩係死，人係生，有時做足規矩唔等於有工作成效，甚至仲會打擊士氣。

不過如果你哋鍾意保持高流失率，確保HR有穩定工作量，上面啲嘢就當我無講過啦！