職場不公平實況 後生啲靚啲就做少啲？

係，我知我係唔靚，又唔係fresh grad嗰啲妹妹仔。我都唔期望有人優待我啲咩，但係都唔好太過分囉。想點啫宜家！

話說我同另一個新同事，孖住做lead個大project。咁個project都唔少嘢跟，加上老細都幾睇重個project，咁都想做得好好睇。咁兩個人做，基本上大家嘅工作量應該差唔多，點知佢一句「唔識」兩句「吓好難」就將大部分嘅推晒畀我。喂，大佬，唔識咪學囉。咩都話唔識學咩人返工呀，又要做埋你嗰份，你份糧畀埋我好冇？

咁都冇計啦，鬼叫人地係新人，又係妹妹仔。躁躁地都係要做完啲嘢，唔係講笑，真係多嘢做到廁所都唔敢去。連續個幾星期，我就晚晚做到十一二點，呢個妹妹仔日日準時六點閃人。哇如果佢遲咗走，六點三先走，老細同啲同事就走晒過嚟，圍攻我話做乜唔畀佢收工。

哇，我真係想一句句三字經車埋去。喂，我就自己做到成隻狗咁，有冇人問過一句呀？真係好唔鬼公平囉好冇。咩唔畀佢放工，佢執嘢執慢咗又關我事嘅。

好唔容易終於完咗個project，交咗份proposal畀老細。老細好快就叫咗我地入房照肺，話份proposal內容唔係好夠。我心諗，大大話都寫咗廿頁紙，要寫嘅都寫咗，仲想點呀？老細一路問我就一路答。個妹妹仔淨係一路點頭，聲都唔聲下。咁梗啦，佢咩都冇做過，鬼識答咩。鬧到我一面屁之後，神奇嘅事就發生啦，老細突然嚟個大變臉，笑笑口咁同個妹妹仔講：「下次要俾心機做好啲，睇好你！」

哇哇哇，咩料先宜家，我真係覺得好唔公平，好可憐，呢個幾星期，做咩都好，我都任勞任怨，個新人唔識做，我自己一個拆掂佢，換返嚟得個吉。

你以為咁就完啦，傻啦，年尾要填apprasial，老細話我表現差，做嘢唔得，所以bonus冇我份，人工加更加冇我份。唉，真心，個老細唔like你, appraisal寫得唔好, 我做乜都無用，就算俾幾多心機都冇用，因為佢只會喺係雞蛋裡挑骨頭。

有人同我講，叫我繼續努力，正所謂「守得雲開見月明」喎。心諗，見月明？見炒魷有！