美斯缺陣 | 球迷勇闖球場與碧咸合照 自爆將被康文署檢控 網民：告埋碧咸啦
在國際賽事上，不時都會有球迷嘗試闖入球場索取球星的簽名，而上週六國際邁阿密和港聯的友誼賽時亦不例外，因此當晚發表聲明嚴厲譴責，指觀眾不得闖入球場滋擾，否則將會嚴格處理，包括立即驅逐出場，甚至交由警方處理。不過在週日（4/2）仍然有球迷不顧康文署的警告，衝入球場草地範圍，成功與碧咸簽名和合照。
這位球迷名為Sam Lai，今日（7/2）在接受商台節目《在晴朗的一天出發》的訪問，承認上述的舉動是一早已經計畫好，被問到最初的目標是美斯還是碧咸時，他透露自己做好兩手準備，身穿阿根廷國家隊球衣，但手持曼聯球衣，而最終的結局就是衝到碧咸身邊。Sam更把二人的合照上載到Instagram上，他表示整個過程都讓他非常驚喜，因為在這之前，他的內心非常糾結，但不想後悔，因此下定決心：「人一世物一世唔想自己後悔，之後就下死心：無論如何一定要衝到落去！」最終成功實現了目標，更用「此生無憾」形容這次的感受。
I did it.
行動代號「決心」
人生第一次下咁大死心，睇曬啲衝落球場嘅片，買埋落場版球衣，簽名筆，帶埋釘鞋(不過冇著)，諗曬所有會發生嘅野。
係衝之前，成個過程我一路都好驚，見到三層欄杆同埋成堆保安。我問咗我朋友好多次，我應唔應該衝。佢問我如果唔衝會唔會後悔，我話一定會後悔，人一世物一世唔想自己後悔，之後就下死心：無論如何一定要衝到落去！
最後真係比我攞到碧咸簽名，仲同我合照，佢真係好靚仔好好人，此生無憾
值得一提，當時康文署的聲明表示：「不得闖入球場滋擾，否則必會從嚴處理，包括即時驅逐離場甚至交由警方處理」。現時未知道Sam這次的事件發展，不過不少人都留言表示：「罰都抵番晒」、「碧咸又肯同佢簽名仲要搭埋膊頭影相，耐得人哋何咩？」、「型到盡頭便是……」、「已經無憾了，攞到簽名所有犧牲都值得」、「告埋碧咸啦，一隻手掌拍唔響」、「4萬人只係敢口叫「回水」，佢就真係勇敢衝入去搵碧咸，唔止回水仲賺有凸啦」、「但一罰就可能係終生不得再入球場喎」、「可以告咩？行為不檢？罰款隨時仲平過張飛」。
