職場騙案 返工大半年就轉工的原因 上司應承試用期後加人工 點知⋯⋯｜網民熱話
廣告
上司應承試用期後加薪
小弟第一次轉工，人工係無任何加幅。但見工時上司應承我，只要過試用期，就會加返＄1,000俾我！咁其實呢次轉工都叫做加咗人工，只係遲少少啫，我當時心裡面係咁樣諗。
日子過得好慢，因為無論轉幾多次工，都只係由一個煉獄跳去另一個煉獄！
三個月後 當無事發生過？
好辛苦咁捱過咗三個月，上司終於召我入房：「做成點啊喺到？」、「同事都幾好，工作都叫上晒手冇乜大問題！」
「我都留意到你係上手得幾快，繼績俾心機啦，俾返封信你通知你過試用期，你仲有冇問題？」
呢世人最憎人呃我
雖則我平時小巴都唔敢嗌有落，但我呢世人最憎人呃我，所以我都忍唔住問：「咁人工方面…係咪會有調整？」
「唔會啊，做咩咁問？」做咩咁問？你條八婆自己應承我㗎！
牧羊人的3次機會
「入職果陣，你同我講話如果過咗試用會加返＄1,000俾我…」
「有啲咁嘅事？唔緊要啦，我見你都幾有心做，你遲啲跟埋Peter個project，到時就一次過加＄2,000俾你啦！」咁大家細個都有睇過狼來了的故事，大家都俾牧羊人3次機會，我又點會唔俾多次機會上司！
絕望轉工真相…
嗯，我中伏了，做咗大半年都無加過一蚊，絕望地又要轉工了。
「Purple弟弟，初步嚟講我哋都滿意嘅，但人工方面暫時可能低少少一開頭，等你過咗試用，我哋就會調整返去你滿意嘅水平！」我係袋入面拎咗支錄音筆、筆同簿出嚟！「你介唔介意講多次？」
