【網民熱話】學生讓出關愛座仍被指責 九巴：有需要就可以坐

撰文：亨利｜圖片：新傳媒資料庫、unsplash、KMB 九巴專頁

學生讓出關愛座還被罵

網民發帖表示，今早（2 月19日）搭111返工，人未太多，但已沒有吉位，除咗兩個近門口的關愛座。有一個學生上車，眼見書包重量不輕，可能佢只坐幾個站，而當時又冇有須要嘅人要坐，他便坐下外面個位。

下一站，有幾名乘客與一個中年大叔上車，學生即時起身行近落車門口（即兩個關愛座已經吉咗），但中年大叔依然唔放過學生。

中年大叔：「你坐㗎咩！呢個係關愛座，唔係比你座坐，你有冇我咁大年紀呀！」

當學生委屈被罵時，車長也忍不住挺身而出說：「嗰位人人都可以坐。」

中年大叔：「呢個係關愛座。」

車長再神回：「關愛座係優先讓比有須要嘅人，無寫你個名，唔一定係你坐！」

最終中年大叔靜下來了！

網民：關愛座人人都坐得

有網民也認為學生沒有做錯，「人地都醒目起左身啦，洗唔洗追住人地黎鬧呀？」。

其他網民指如果自己在場，也會挺身支持學生「比我會幫口」、「學生好乖」、「唔知點解，感覺而家有好多香港人，唔係好正常，是非不分。嗰個學生係冇錯」。

同時有網民說：「其實我到而加都唔明關愛座點解唔坐得，關愛座即係優先座，無人需要優先，就人人都坐得，無人有需要時坐落去係善用資源，而且唔係老人家先會病，我都成日坐成日比人鬧。」

九巴表態：有需要就可以坐關愛座

九巴在facebook專頁「KMB 九巴專頁」表態指，「關愛座有需要就可以坐」，續指「自關愛座推出以嚟，社會一直存在好多唔同嘅聲音。其實學識尊重很重要，關愛座嘅原意就係讓畀有需要嘅人坐，不論係身體唔舒服、長者、孕婦、抑或殘障人士等等。大家有時候都會有身體唔舒服想休息嘅時候，肉眼睇唔見但唔代表佢冇需要㗎， 如果咁啱冇人需要坐，大家其實坐下都冇問題㗎」。

有網民表示很同意九巴的帖文，「其實不論有無或者果個係唔係關愛座，自己情況許可都可以讓位俾有需要既人嫁」、「只要存有愛心，任何一個座位都可以是關愛座；若言沒有愛心，全車關愛座又如何呢？」、「其實無人坐時可以坐，看到有需要的人便讓比他坐無問題」。

另外，亦網民表示害怕坐關愛座仍會被「批鬥」，回應指「咁不如改名叫”須要座”啦！」、「可唔可以喺關愛座上面印多一句”任何人都可以坐”？」、「請取消關愛座。親眼見太多老人家逼人讓坐，聲大夾惡，好恐怖」。