同事結婚Rosewood擺酒 嫌$1,500人情少 網民：啲人結婚係『請』飲喎
同事Rosewood擺酒港男感驚慌：到底人情要畀幾多先啱？
有港男在LIHKG討論區發文指，同事結婚於Rosewood擺酒請飲，「未去過咁高級嘅酒店飲，唔想畀人笑同唱一世，食夜晚應該畀幾錢人情」。結果有大批網民留言解答，不少人都認為「$1,500已經畀到盡，最靚仔係呢個價」。而根據生活易（ESDlife）旗下「新婚生活易」網站最新公布的「2023年結婚消費調查」結果，新人於2023年平均結婚開支上升至近$42萬，當中最高消費的項目仍然是「婚宴酒席」，平均花費$170,886；男方畀女方的禮金中位數亦升至$68,888。而大家最關心的婚禮人情中位數，高級酒店婚宴人情中位數為$1,500；一般酒店、私人會所、特色婚宴場地為$1,000；酒樓、午間婚宴及西餐廳為$800。而非婚宴形式的如酒會，人情價為$800；出席婚姻註冊處或教堂簽紙儀式，則為$500；純粹派餅卡，沒有獲邀請出席婚禮或婚宴，人情則為$300。
網民：去飲又唔係夾錢食飯，點解要畀人笑
網民建議$1,500，可惜被同事們嫌少，港男指「食Lunch時厚著面皮問同事，大家都話畀$2,000」。見到事主言論後，不少人大鬧無理！大家認為「人情有公價簡直係天下間最離譜的事」，指「去飲又唔係夾錢食飯，點解畀得少人情要畀人笑」、「搞清楚未，啲人結婚係『請』飲喎，抵制垃圾人情文化」、「一來，你擺得靚你選擇，做乜要幫你夾錢；二來，我一直唔明，你請我飲，明明叫請我為乜要出錢」、「你擺得靚係你自己本事，如想回本就係戇X」、「邊個請我都係比1k，心安理得」、「$600真係盡，一陣你話擺美國我咪要畀幾皮嘢人情」、「唔係搵十幾廿皮以上嘅同事最多俾一千，你要威搞大龍鳳，老馮要人資助咩」、「啲人情越嚟越離譜，不如叫人送間屋畀你」。
「擺得Rosewood都唔會自在人情幾錢」
網民對「人情」發牢騷，但有人卻提醒一點「有錢人擺酒結婚唔自在人情幾錢，無錢人結婚先會計住晒」，指「擺得Rosewood都係有返咁上下錢，人情對佢哋嚟講只係數字，你畀錢佢哋亦顯得庸俗，建議送啲有紀念價值嘅嘢」、「試過去Rosewood，主人家所有人情唔收」、「啱啱上兩星期去咗個Rosewood婚宴，就係喺Ballroom搞！全晚大、中、小提琴、Live Band墊底，香檳威士忌任飲！四大長老話要搞得好好睇睇，成晚加埋用咗接近2.2M。老實講，如果係長老出錢就無乜所謂，幫手做場大龍鳳人情畀返晒佢。如果係自己出錢就不了，有乜理由一個人想做一樣嘢，係要人哋埋單」。
