細數香港人經典反智行為

Godiva限時雪糕優惠，係人見到都會心動，但當你見到條人龍長到咁，你仲排?計下數啦Ching!

Godiva雪糕45元買一送一，即是每杯平均22.5元，排隊起碼要排2至3個鐘，計番時薪，都只係得7.5至11.25元，人工仲低過最低工資，值唔值? 自己諗。(排隊黨另計)

不過，其實應該要正面啲，呢啲先係香港人的獅子山精神。

IKEA深夜一折益街坊 港人迫爆Megabox

宜家家俬九龍灣分店於6月27號晚上11時舉辦「深宵瘋狂購物夜」，部分貨品一折開倉發倉，近7,000困獸鬥狂搶貨，首20分鐘就已經清空了一折的貨品。

齋睇表面，好似高下立見，價值799元的燈飾只需79.9元，原價899元的地毯售89.9元，平日13,990元的梳化1,399元有交易，有人早到排隊等入場，入到場仲要排隊等畀錢，好似話有人排到凌晨5點先可以成功埋單，仲要搞到九龍灣大塞車，你話香港人的底蘊都係師奶攞著數心態!

但係去到咁夜，IKEA又講明當日不設送貨服務，實行自己買野自己拎，當時出到IKEA門口都已經係深夜，唔通抬住張啲傢俬行路番屋企咩? 淨係深夜叫車送貨，都要二百幾三百蚊，如果爭唔贏，只係買得幾百蚊野，到頭來賺咗可能只係幾十幾廿蚊，計埋排隊時間(夜班時薪通常高啲)，真係蝕多過賺囉。

一蘭拉麵呆企朝聖

一蘭拉麵係日本其實好普遍，兩年前首次來港設店就風靡港人，人龍由朝早7點排到凌晨5點，差唔多24小時都有人係一蘭門口排隊，平均每次要等90分鐘，中午放飯昤間更要等兩個鐘，最長仲要等三、四個鐘，lunch hour 過埋都仲未食到一碗麵。

比較下價錢，淨計一款豚骨拉麵，香港售89元，與日本店售790日圓（當時換算港幣約62元）比較，貴約四成。排隊等咁耐只為一碗麵，仲要係水貨比正版貴四成，抵咩? 可能大家當時都只係為打卡，在facebook博呃like，所以依家一蘭依家冇人再排隊，個個寧願飛去日本真正的一蘭拉麵朝聖好過。

【經典回帶】：瘋搶麥記snoopy

要數港人排隊最震撼一次，要數返1998年麥當勞換snoopy公仔。當時麥記推出一套28隻不同造型的snoopy公仔，每日推出一款，只要買個餐加錢就可換到。

但萬萬想不到，呢套公仔搞到幾乎無數香港人冇覺好訓，每朝5點便起身排隊，全港各麥記均現長長人龍，場面何其壯觀。有人更加要公仔唔要包，大批麵包薯條塞滿垃圾筒。就算麥當勞宣布有補購計劃，香港人都仍然繼續排隊，真係排隊排上癮。

其實睇返當時一個餐要23.8元，再加6元換，即係成本要30元左右，換足28日就840元。小編依家再上網查看呢批snoopy二手價，有人一套放售，有300元、有800元，仲要反應麻麻，冇乜人買。當初排咁耐，而家又唔值錢，真係反智行為的經典。