窮遊攻略 — 裝備篇
廣告
又到暑假，唔少人都籌備去旅行。旅行就當然開心啦，但前期有好多野要添置，當中有啲又貴又唔常用，好似相機、旅行喼咁，旅行完返來仲要搵地方安置，尤其是香港地依家樓價萬萬聲一呎，真係放多啲野都覺阻訂。但旅行冇佢地又唔得，典蒜呀？不如試下租。
相機出租
去泰國玩上水活動，想要部防水 相機；去日本睇富士山，想要支廣角鏡頭影全景；返大陸山區想影風土人情，又想要支長距離變焦鏡。咁多器材，一來無錢買，二來無位擺！嗱，唔洗喊濕幾個枕頭，香港而家有「相機鏡頭出租」嘅鋪頭，例如b3 Camera，大牌C字變焦鏡頭最平200元租三日，影完還返，下次又可租過其他，唔洗等埋發叔架！
行李箱出租
呢排日yen跌，泰baht又跌，唔買點對得住自己呀！但喺由於土地供應問題，行李喼呢啲史前龐大物體喺屋企應該絕種。突然間旅行癮起，訂左機票，whatsapp去租喼公司，24小時內就送到你屋企門口！200元租五日，仲不時有優惠添。靚靚大牌子喼，拖出去都特別有自信，返到嚟即刻還返又得，得左！
旅遊書出租
去旅行如果唔想食到燒味壽司呢啲極品，有本旅遊書傍下身好喎。之但係去完一次旅行就冇用，租幾多迷你倉都唔夠啦！去圖書館借，資料又舊又唔UPDATE。想要新淨又要最新出版，BOOKGUIDE潮租旅遊書就乜都有齊，20元租10日，仲慳唔少呀！又喺whatsapp去就得，不過小心絕密筍料曝光呀。
