的士司機職場事 以貌取人的公司
撰文：我的你的紅的 ｜ 圖片來源：網絡圖片
喺灣仔，一個着住連帽外套嘅四眼女仔，怒氣沖沖咁跳上車，喺佢猛力關上車門嘅時候，已經等唔切同我講：「去康怡廣場，快，趕時間。」
「搞咩咁趕呀，係咩公司無啦啦要開會？」我問，公司開會導致遲到要搭的士，都佔咗幾大部分嘅人，同乘客一齊鬧公司上司召開無聊嘅會議，係同乘客打好關係嘅簡單法門。
「唔係呀，啲死差佬見我有紋身就問長問短，阻住晒。」睇黎乘客嘅憤怒唔係因為遲到，而係因為無辜被查。聽佢咁講，我好自然咁進一步打量乘客，金髮BIG眼，配埋副文青眼睛加上唔高嘅身形，真係想像唔到有咩咁可疑。「你啲紋身好明顯咩？」由於司機位見到嘅角度有限又黑暗，我完全睇唔到有紋身。
「我手手腳腳都有㗎，你睇下。」講完佢就舉起手臂，拉起衫袖，好似健美比賽SHOW肌肉咁擺個L出黎，可惜喺昏暗嘅車廂中我只係見到有紋身，欣賞唔到係咩圖案。「嘩，你都幾多紋身喎，我有啲FD紋都係紋幾個圖案仔咋。」「我呢啲邊算誇張，再誇張都仲有。」「咁你生活會唔會好麻煩？」我問，我諗嘅係紋身多會唔會要保養，或者特別清潔，但係女乘客理解咗另一個意思：「梗係麻煩啦，如果唔係頭先點會俾啲差佬截停丫，返工都好麻煩㗎，睇下咩工啦，之前返過一份，公司一定要我着長衫長褲，唔可以俾人見到紋身。」
錯有錯着，女乘客講嘅麻煩，又真係幾麻煩，夏天都着住長袖衫褲返工，諗到都覺得熱，除非係返啲好似的士咁，可以自由調節工作場地溫度嘅工種，否則都幾難做到。「咁你實唔做得耐啦。」我從佢話係「之前一份工」作出推斷。
呢啲以貌取人嘅公司，留喺度做咩？
果然，乘客即時搶答：「做一個月即走啦，呢啲以貌取人嘅公司，留喺度做咩？」「咁都好難怪佢哋嘅，呢個社會就係鍾意以貌取人，我哋都無辦法。正如唔少人都蠢到將對的士佬嘅整體印象，投射到每一個唔識嘅的士司機身上啦，咁個社會係蠢，我哋有咩辦法？我咪着好啲囉，啲人即刻覺得我好文明好斯文㗎，但明明我無啲粗魯嘅老司機咁熟路。」我無奈咁講出香港以貌取人嘅普遍狀況。
「我明丫，我哋鍾意紋身嘅都係咁，啲人唔識你，一見到有紋身，就會幫你落定義，一定係咩咩咩嘅人啦。根本香港啲賊就五官端正，好似去台灣殺咗自己條女嗰個去咁，咪又係好眉好貌大粒癦，睇得出咩？我夠膽賭佢無紋身添呀。」
現實，往往就係最難以反駁嘅論據。「唔緊要啦，好彩搭的士都快嘅。」就到達康怡廣場，我都只可以咁樣安慰佢。「頭先上車已經遲咗喇，頂。」乘客講完，拿拿聲落車。我起返枝旗再定一定神，車程都十五分鐘，照計警察查身分證都係十分鐘啫，如果上車前已經遲咗，咁佢係唔係都遲到㗎啦，只係有阻礙遲更多啫。
