發展商的語言偽術

不過最近新盤又再空群而出，唔搞返啲噱頭，都好難突圍而出吸引到顧客。所以最近又有不同的銷售口號出現，呢啲口號表面聽落好似幾好，咦，咪住，諗深一層原來係搵笨，而照字面解，發展商又冇講大話呃顧客喎，大家又冇佢乎。只能夠講一句：「認真便輸了﹗」

究竟最近發展商出左咩語言「偽術」呢？一齊睇睇：

CAPRI：擁港鐵雙站優勢

最近新盤焦點之一，就係會德豐(00020)物業組合「O’ SOUTH澳南」今年推出的第二個樓盤CAPRI。呢個盤除開價平區內二手樓價兩成之外，仲有一個獨特賣點，就係享港鐵雙站優勢(將軍澳及調景嶺站)。

就咁睇，可以兩個港鐵站都到，好似好方便咁喎。咪住，諗真啲先，兩個站都到，咪即係兩個站中間，即係兩頭唔到岸啦。

CAPRI位於唐賢街33號，小編即刻用google map搵佢的位置，度埋行去地鐵站的距離，其實都要各行大約10分鐘。呢種兩頭唔到岸究竟算係優勢，定係算缺點呢？

峻瀅II：窗台寬大實用

峻瀅II係長江地產(01113)樓，大家都知誠哥樓幾出名「實用」啦，當中大窗台就唔少得，而且仲愈來愈大。

但偏偏長江地產(01113)早前推出的新盤峻瀅II，就以寬敞實用做賣點。難得誠哥肯推實用樓，梗係要睇睇啦。點知一睇，真係O哂咀。佢地個賣點確係寬大實用，但講緊係個窗台咋。

其中一個實用504方呎的單位，客廳竟然有一個50方呎的大窗台，長已經有16呎，足夠瞓兩個人。

雖說呢個窗台唔計入實用面積，長地仲話係送畀大家咁話，真係多謝晒。不過大家買樓時，揀都盡量唔要大窗台啦，勢估唔到長地竟然以此做賣點，果然夠新創新呀，不能不說一句：「誠哥，你好嘢﹗」

世宙：跨地域多軸交通網

世宙又係長地樓，不過今次唔係賣實用，係話自己有個「跨地域多軸交通網」。

咩火星話黎架？依小編理解，應該係話佢有一個可以到好多唔同地區的交通網絡，即係交通方便啦。

一講交通方便，好多人都會聯想到坐落九龍塘或者中環，點知原來佢係元朗，仲要係較為二線的朗屏站。住到大西北咁老遠，唔跨區都唔得啦。咁如果真係住正係尖沙咀，應該要叫「超級無敵跨地域多軸勁爆交通網」，住係東涌鄰近機場，仲可以話「跨國多軸交通網」添呀。

經典之最：一脈相連九龍塘

其實出口術已經唔係新鮮事，講經典，一定首推2010年推出的盛薈。冇錯，呢個盤又係長地樓。

盛薈其實係大圍屋苑名城嘅二期，但廣告卻以「一脈相連九龍塘」及「傳統豪宅地段九龍塘一脈相連，共享翠綠壯闊獅子山景」，全世界都以為屋苑坐落於九龍塘，當時開價仲要係九龍塘豪宅價，點知原來係九龍塘獅子山後面的大圍先岩。

雖然交通上，搭港鐵真係只隔一個地鐵站，但都叫隔左個山，校網都唔同晒，諗住買佢讀九龍塘名校的父母，真係上晒檔。