田北辰評財政預算案2021 反對調高稅率 中產再成最慘階層：點解要cut晒啲糖呢？
在失業率高企、經濟受挫的環境之下，社會有聲音期望今次的財政預算案會如去年一樣派錢紓困，今年最終宣布每人派發5,000元電子消費券，並宣布推出失業貸款等措施。立法會議員田北辰接受《經一》訪問時指，今次的施政報告整體合格，但沒有人應社會需要繼續「派糖」：「唔係高分，因為佢無體恤民情。」
撰文：經一編輯部｜圖片：中新社
派糖與否應視乎社會需要：點解要cut晒啲糖呢？
「我就認為，政府『派糖』、紓解民困，係應該睇社會嘅困難程度、狀況，就唔係睇庫房有幾充裕。」
田北辰指，以往庫房「水浸」之時，政府就選擇「派糖」、派錢，但社會上的人的生活並非相當艱苦，到今年經濟受挫，香港有很多人失業、開工不足之時，卻「減糖」：「竟然佢啲糖就差唔多冇派咁滯！」
除公屋免租、綜援雙糧減少等，他特別形容中產階層的處境「最慘」，例如薪俸稅及個人入息課稅寬免上限由20,000元減至10,000元，而事實上他們都同樣面對開工不足、放無薪假的狀況。
財政司司長陳茂波昨日提到，預料今年的財政赤字或破紀錄，但同時亦指今年香港經濟恢復有正增長。田北辰便提到，在疫苗陸續推出之後，各方亦預料經濟會逐漸復甦，連陳茂波自己亦提到估計會有正面增長，認為香港庫房並非走到「好大鑊」的地步。
「嗰啲赤字係用某一個結算方式去睇，你知佢好多基金都有回報㗎嘛，嗰啲全部都無計落去。香港政府庫房係咪面對一個地步，好大鑊？梗係唔係啦。 」
有見及此，他更認為政府應繼續「派糖」紓解民困：「淨係今年之嘛，啲糖呀盛呀，啲普羅大眾咁需要，就算你唔多過舊年，應該同舊年一樣啦！短暫嘅紓緩，點解會要cut晒啲糖呢？」
推出失業貸款就無審批困難？「𢯎穿頭都唔明」
社會大眾期望政府能紓解民困，源於過去一年本港經濟大受打擊，失業率高企。對於坊間希望政府推出失業援助金的訴求，政府過去一直以難以審查為由推搪。今年的財政預算案最終宣布推出失業貸款「百分百擔保個人特惠貸款計劃」，貸款額達80,000元為上限。
田北辰直言：「我覺得係好奇怪嘅做法。」
他說：「而家又話失業人士可以借8萬蚊畀佢。咁佢點審查呢？我就𢯎穿頭都唔明。咁如果佢呢個8萬蚊審查係有信心做得到嘅，咁Day 1直情派咗出去就算啦。」
他又指，現在貸款的對象是個人而非公司，認為貸款難以真正幫助申請人：「 咁佢將來咪又係辛苦啲要還返呢筆債。你而家唔掂借啲錢，將來可以賺錢就可以還返。呢啲失業嘅人，我都唔假設一兩年內可以大幅加人工啦，咁咪一樣，所以係無意思。」
分5個月推行消費券 料作用有限
至於政府今年不再如往年一樣全民派錢一萬，改以每人派發總值5,000元電子消費券，分開5個月派發，每月1,000元。田北辰認為措施能部分回應社會大眾生活的困難，但對於刺激疫後的經濟而言似乎作用不大。
他形容，這項措施基本上能幫個市民的生活費，預料最大的收獲行業會是售賣必需品的超級市場，「矛盾地可能係過去一年最大嘅得益者。」然而，現在的措施則未能幫助到在過去在疫情之中真正水深火熱的企業。
他認為消費券的實行上應該縮短時間，同時減少限制，讓市民可以一次過消費5,000元。
印花稅增加3成 反問：大戶點解仲要嚟你度？
關於政府多次提及的財政赤字，田北辰談到，他從來都反對調高稅率以增加政府收入，認為擴闊稅種才是穩定稅收的方法，同時亦能令更多人落入稅網：「稅呢樣嘢長遠嚟講係財富再分配 ，令無產階級條氣順啲 拉近啲社會嘅距離。一定係要同資產增值個啲掛勾。」
他指，對於陳茂波到現在仍說現在不是稅制改革的時機感到失望，「而家唔係時候？我想請問，當你庫房有千幾億盈餘唔知要點派嘅時候，嗰時你講引進新稅種，畀人笑死你啦！」
談到股票印花稅3成的增幅，他直言：「以前仲高。但你要留意一樣嘢，今時今日，香港似乎係好少數嘅地方收股票印花稅。大戶嚟講係加咗3成嘅營商費用，咁佢有咁多其他地方，係咪仲嚟你度？ 」呼應他指擴闊稅基的建議，他笑說，「賺咗錢要畀稅天經地義。而家呢，分分鐘有個人炒燶咗、蝕本個啲要畀（稅）。」
