用交友APP識女仔 P 圖現真身 女神偷望後即時被叮

我揀咗張影得我幾好睇嘅相，稍為修飾一下嚟做profile picture，篩選咗一啲我唔鍾意嘅類型後就正式開始yo女仔。

我自問自己條件都唔差，25歲，外型正正常常，科大engin畢業，入咗間大公司，fresh grad人工已經有2字頭，但我要求都唔係好高。以前追過啲女仔，雖然收好人卡居多…… 但我都叫拍過一次拖。

唔要太瘦更加唔要肥

我想搵個樣正正常常識得打扮下，唔要太瘦更加唔要肥，要BMI正常偏瘦嘅，個身高就大約150cm左右，大學畢業有穩定職業，養到自己但唔好成日OT，唔要做sales嗰啲女仔，因為通常好

materialism而且好bitch，仲要成日拋頭露臉就更加唔係咁好啦。斯斯文文就最好，好憎嗰啲成日粗聲粗氣笑起上嚟仲會打人嗰啲bitch。

因為我要求唔高，咁個apps就有一大堆女仔俾我揀，啲樣真係幾ok架，不過交友apps呢啲就預咗add 10個8個都唔覆架啦，所以我索性漁翁撒網，咁都有兩三個女仔覆返我。

其中有一個叫Candy，人如其名個樣幾甜，好有女朋友嘅感覺，同佢傾計都唔會dead air，有來有往唔會吊高嚟賣。咁啱開始傾計嗰日我病咗，我同佢講我唔舒服，佢仲噓寒問暖，問我有無睇醫生、準時食藥。我同佢呻唔想食粥，佢仲影咗碗粥嘅相send俾我，錄音講話陪我食，把聲好甜，甜到我有啲飄飄然，我好似終於知拍拖嘅感覺係點。雖然嗰陣先係識得嗰幾個鐘，但我喺嗰下我就知自己搵到生命中嘅女神，下半生順逆都會聽住呢把聲過。

Candy話佢係Kong U畢業，依家係社工，同佢把聲真係好匹配，溫柔又有愛心。不過短短兩日已經睇得出佢有啲缺點，就係成日隔好耐先覆，有時見佢明明online都唔覆我，真係有啲傷心，不過唔緊要，我諗住等遲啲一齊咗，就再同佢傾吓呢個問題，畢竟社工應該都好忙加嘛。好彩我聽啲frd教，一直用英文同佢傾計，話女仔鍾意英文好嘅男仔，話感覺上高級啲同有上進心喎，而Candy真係好鍾意，仲讚我英文好，真係好開心。

傾咗幾日計之後，我睇得出佢都有心同我發展嘅，咁就係時候要約佢出嚟見吓面，所以我約咗佢嗰日接佢收工去睇戲。

第一次見女神

第一次見女神，我梗係好緊張啦，專登著咗套西裝裇起個頭，仲買咗幾枝花諗住一陣送俾佢。我早咗足足半個鐘到，無理由第一次見面就要佢等我加嘛。嗰日企喺港鐵站等佢，好似特別多人望住我，果然心態決定境界係啱嘅，我終於有等女朋友放工嘅一日，心諗住一陣就要拖住個靚靚女朋友，令我有前所未有嘅自信。

半個鐘、廿分鐘、十分鐘、五分鐘、一分鐘、夠鐘！我一直都有四周圍搵佢嘅身影，但都未見到profile picture上嘅Candy本人。本身見到有個女仔有少少似佢，嗰個女仔仲望咗我一陣，但到我同佢對望嘅時候佢即刻轉身走咗，睇埋個身型我諗都唔係Candy嚟嘅，不過，可能我個樣真係太猴擒，即刻要收斂吓。

過咗約定嘅7點後Candy都未到，我就text吓佢，問吓佢喺邊，又打過俾佢，但無人聽。過咗一陣，Candy覆我話：「Sorry但我都係唔嚟喇。」我當堂呆咗反應唔切，第一係因為佢從來無同過我用中文打字，第二先係佢放我飛機。

咁我梗係唔會就咁由得我終身幸福無咗，可能佢都係想俾啲考驗我嘅啫！咪問吓佢點解。。。點知佢竟然俾個咁嘅答案我：「其實係你比我想像中有出入，主要係身型同棚牙，Anyway sorry。」我更加呆咗，咁算點？我望吓我張profile picture，再開個前鏡望吓自己，明明一樣樣，有咩問題？有咩出入？自問我更加唔算差，身高都有成一米七，中等身型大約70kg，我係有啲硝牙，但平時都睇唔到，從來無人話過我真人同相有分別。

佢唔再覆我

但無辦法，我已經認定咗Candy係同我共渡下半生嘅人，所以我同佢發誓會去箍牙同做gym…… 希望佢會回心轉意…… 但佢唔覆我。

我再試吓動之以情，話俾佢知我真係好鍾意佢好想今晚見到佢…… 點解我哋成個禮拜日日傾計，佢依家都無行過埋嚟睇就走咗去？成個禮拜我時時刻刻都諗住佢，唔通佢對我嘅感情係咁脆弱架咩？因為我突咗隻牙出嚟就走咗去？

最後佢覆我，仲hurt。佢話：「我覺得都好正常姐，將心比己，如果我係豬扒但又P到好索你都接受唔到啦。」，仲話：「你係有心嘅咪減肥同箍牙，我哋有緣再見。」

點解啲女人可以咁現實？大家相處咗成個禮拜假架？你明明對我都有feel，原來係咁脆弱嘅！單睇外表就判我死罪，公平咩？？？