燈神接班人

好公道咁講, 唔係因為大師同我地合作而讚佢，而喺大師最近真係唔燈，仲幾準喎，話恒指上23,000點就真係上左，10月底有機會回一回，亦都中。不過大師準個陣大家冇大肆宣揚咋！

最近上落市格局，其實都幾悶，有啲讀者問小編有冇咩另類指標參考下。小編就諗起平日上討論區，梗有幾個特別燈！小編就講唔實佢地係咪好嘅另類指標，但大家有時間可以睇下佢地出嘅post，睇下佢地有幾「準」！

接班人一號：隨遇而安的人

人稱樂觀SIR，成日透過技術分析去點評大市。可以話係討論區財經台嘅台柱，恒指大好友，之前預測恒指會上到46,000點，之後大跌市就開post投降。轉呔睇淡之後少左人留意，但間唔中都會出post發表偉論！而家樂觀SIR就話係熊二反彈，覺得會彈上25,000至26,000點。大家又放長雙眼睇下佢破唔破到燈！

最突出戰績:
(1) 7月中出post話牛市未完，仲話要有堅定嘅信念同信心，先可以食盡升浪，結果8月跌穿24,000點之後，直到而家10月尾都未上得返去。小編好堅定咁等左兩個月，說好的牛市呢？

(2) 7月27日夜晚再出post轉口風話入左熊市，話第二日開市不問價沽貨，仲話明日低位即係後日高位。結果第二日低開高收，恒指最高仲升近600點！真係燈力十足呀！

曾預言恒指上46,000點，有哂數據，似模似樣喎﹗

7月27日出POST轉口風

7月28日即被討論區巴打「吹捧」

討論區巴打話樂觀SIR係精神領袖喎

接班人二號：小羊兒

活躍於財經台嘅巴打，成日都開口燈！仲成日燈埋自己，全盛時期係各人嘅另類指標。大家好多時會喺夜晚問下小羊兒點睇第二日個市，唔需要咩分析，只係靠估已經好準。有時啲細價股佢有貨就唔升，一放左就爆升。仲有巴打話由小羊兒離場起計，該股下跌空間只有3-5%，但上升空間就有成15-30%。

最突出戰績:
(1) 9月15日收市後睇第二日跌(當時21,455點收市)，第二日就高開200幾點(21,731點)，最高仲爆升上22,103點，差唔多成700點！

(2) 9月16日又係咁，16號晚睇跌(當時21,966點收市)，第二日又高開200點(22,172點)，最高都爆到上22,203點！一個字，準！

小羊兒與網民的對話

網友點評

呢啲另類指標命中率咁高，小編梗喺會繼續睇實佢地嘅評論啦。如果小編覺得跟得過，就會第一時間話比大家聽！