無藉口落雨唔做運動 香港5大室內緩跑徑

5大 室內緩跑徑 任你跑

室內緩跑徑 跑步方便在於唔洗日曬雨淋，場內又有冷氣，重中之重是有更衣室同沐浴設施，跑完可以沖個靚涼，唔洗帶住一身汗味。

而體育館開放時間大多由早上7點開始，返工前都跑得。現時5條室內緩跑徑分佈於中環、調景嶺、上水等地，位置方便易去，不少更有其他玩樂設施配套添！

1. 豪華＋方便 調景嶺體育館

調景嶺體育館於2015年啓用，新束束的室內緩跑徑長約150米，為5條之中最新同最豪華！其他設施仲有戶外運動攀登牆、兒童遊樂場，室外仲有園景花園同草坪，跑完步仲大把嘢玩。而體育館位於將軍澳翠嶺路，港鐵站一出即到達，非常方便。

室內緩跑徑啟用一年多，場地仍然好新淨，亦夠晒光猛！

調景嶺體育館設有2條室內緩跑徑，唔洗怕要同人爭。（2條均長約150米）

從落地玻璃可以見到一眾運動員於球場上的英姿

其實室內緩跑徑下面是室內羽毛球場（共8個），可以邊跑邊睇人打波。

特別推介：兒童遊樂場

其他體育館少見有咁大型的兒童遊樂場，調景嶺體育館的兒童遊樂場以海洋為主題，入面有不同設施俾小朋友玩，跑完步可以同小朋友去放電。

（圖片來源：康文署）

體育館外仲有大草地，好relax！（圖片來源：康文署）

調景嶺體育館

地址：將軍澳翠嶺路2號（港鐵調景嶺站A出口）（顯示地圖）

開放時間：每日上午7時至晚上11時(定期保養日除外)

電話：2481 5033

2. 除下西裝去跑步 香港公園體育館

香港公園體育館位於中環，地點近山頂纜車總站，啱晒於中環、灣仔，金鐘等地方返工的上班一族。響辦公室坐完一日，不妨收工除低套西裝去跑下啦！

香港公園體育館的室內緩跑徑其實同樣是觀眾廊，長約150米。

香港公園體育館由1991年開始啟用，其室內緩跑徑可能是最有歷史！

雖然設施上可能無咁新，但好在地方近！

香港公園體育館

地址：香港中環紅棉路29號（顯示地圖）

開放時間：每日上午7時至晚上11時（定期保養日除外）

電話：2521 5072

3. 上水＋粉嶺最靚緩跑徑 保榮路體育館

住上水同粉嶺的朋友一定識保榮路體育館，因為保榮路體育館有全北區唯一的室內緩跑徑，住新界的你不妨去朝聖。

保榮路體育館有2條室內緩跑徑，可以同朋友孖住跑。（圖片來源：康文署）

有唔少跑手都鍾意去保榮路體育館的緩跑徑跑！

保榮路體育館另一特色是有少見的美式桌球室，仲有戶外運動攀登牆，跑步之餘可以試下其他活動。

上水保榮路體育館

地址：新界上水百和路19號（顯示地圖）

開放時間：每日上午7時至晚上11時(定期保養日除外)

電話：2639 2979

4. 四通八達 天水圍天暉路體育館

講起天水圍，通常得到的回應都是「好遠啊」等，其實天水圍都好易去。而天水圍的天暉路體育館亦四通八達，旺角、青衣、元朗等地方都有車去到，有心跑就唔怕遠啦！

天暉路體育館天暉路體育館的室內緩跑徑相對無咩景觀睇，可以專心跑步。

天暉路體育館的室內緩跑徑全長130米，雖然是最短的室內緩跑徑，但緩跑徑有3條跑道，夠晒空間跑！（圖片來源：康文署）

天暉路體育館仲有5條攀爬線的戶外攀石牆，跑完去睇下攀石都得。（圖片來源：康文署）

天水圍天暉路體育館

地址：天水圍天瑞路63號（顯示地圖）

開放時間：每日上午7時至晚上11時（定期保養日除外）

電話：2473 0229

5. 將軍澳另一選擇 坑口體育館

同樣位於將軍澳的坑口體育館亦有一條長約150米的室內緩跑徑，但場內只有一條緩跑徑，設施亦無調景嶺體育館咁新。不過勝在位置方便！

坑口體育館雖然只有一條室內緩跑徑，但空間感都非常大。

緩跑徑地下會印有幾多米，可以計下自己跑左幾多米。

緩跑徑下面是羽毛球場，想方跑方睇人打波都得！

將軍澳坑口體育館

地址：將軍澳培成路38號（港鐵坑口站B出口）（顯示地圖）

開放時間：每日上午7時至晚上11時

電話：2623 5928

原文：新假期

延伸閱讀：

【Meethk創辦人獲63萬Fans追隨】
http://www.edigest.hk/Vip/detail?id=5468
【Android Pay香港推出 5大購物優惠懶人包】
http://www.edigest.hk/Vip/detail?id=5618