港鐵4大筍工 時薪高達$70
撰文：JOEY
講到筍工一定有港鐵公司份，因為手持佢張員工八達通可以免費搭車，真係為大眾學生慳唔少，不過其實唔止大學生可以做，以下呢幾份工作對想找兼職的職場人都無任歡迎架！
港鐵四大筍工排行榜
第4位：車站助理（時薪$57）
車站助理即係人稱「波板糖人」、通常喺月台上出沒嘅港鐵職員，佢哋嘅主要工作就係維持月台秩序，睇住唔好俾啲乘客跌落嗰條空隙度，不過有啲車站助理要負責埋檢查冷氣，不過都係「手板眼見工夫」。
一般而言佢哋返工嘅時間有兩款，一係每日返1.5小時但就一個禮拜返足五日，另一款就係每日返三個鐘左右但就一個禮拜返三日，時間係由HR分配，通常都係返啲繁忙時間，但日子就唔係好彈性，如果之後時間唔啱都唔係你話想調就有得你調！分分鐘要辭職再IN過。
不過喺每班車出入時重覆性哋嗌嗰幾句口號：「列車即將到站」、「小心車門」、「唔好超越黃線」…… 加上唔可以同人傾計（乘客除外），其實都幾悶。有啲站好似東鐵綫咁無冷氣，就會特別辛苦。
第3位：客務中心助理（時薪$70*）
即係平時幫你增值嘅港鐵職員，人工高又有得坐冷氣房，返工時間比起車站助理彈性，但係要肩負嘅責任都幾大。
因為要處理錢銀嘢，所以最好都確保自己數口有返咁上下精，因為最終唔見咗錢嘅話都係要你自己賠返。另外港鐵嘅客務中心永遠都係所有人心目中嘅詢問處，乘客自己嘅八達通扣多咗錢又好、唔見咗小朋友又好、啲巴士線去邊甚至深圳有咩玩都好，全部都會第一時間走嚟問客務中心助理，仲通常都要求佢哋快過保特咁回答，真係鈍一秒都唔得！
第2位：月台助理（時薪$57）
其實同車站助理差唔多，不過月台助理狹義啲，係指輕鐵月台上工作嘅港鐵職員（去見工千祈唔好答錯！有朋友因為答咗自己想做月台助理結果就畀人DQ咗）。
雖然工作環境無冷氣，但人流比較少，管理層行過機會都比港鐵站少，所以雖然無客務中心助理咁高人工，但就輕鬆好多。
第1位：頭等車票檢查員（時薪$70*）
即係平時頸上掛住部機，入去頭等車廂驗票嘅港鐵職員，人工高而且工作簡單，但又唔會好似車站助理咁要重覆嗌口號咁悶，起碼都叫有得郁吓！
不過呢份工好似唔會成日對外招聘，試過有朋友係做緊車站助理嘅時候被「升遷」至呢個職位，咁矜貴仲唔係大筍工？
不過因為港鐵公司形象上的確唔係咁討人歡喜，有啲比較激進嘅乘客事無大小都會搵港鐵職員出氣，有前員工就反映話有時會無故畀乘客怒目而視，尤其係做朝早更時，晨早流流乘客嘅心情都唔多好，會對身邊嘅港鐵職員有所挑剔，所以依家港鐵職員做嘢時都多咗好多面對乘客嘅挑戰。希望呢個情況會喺未來有所改善，等港鐵呢幾份工成為名符其實嘅「絕世筍工」啦！
*根據2016年1月資料顯示，一切以相關機構公布為準。
延伸閱讀：
【IG代購 副業可當正職做】
www.edigest.hk/Vip/detail?id=4223
【1888元飛巴黎購物 筍工之最】
