港媽埋單向收銀掟信用卡 教女唔好「讀書唔成」做理貨員｜網民熱話

撰文：Evita （新假期）| 圖片：電視截圖、新傳媒圖片庫、西客之道Facebook

港媽埋單向收銀員掟信用卡

早前有網民投稿至Facebook專頁，回憶當年考完公開試後，就做兼職售貨員，而事件發生嘅當日就被派去做收銀位。（樓主並無表示做邊個行業）

 樓主話舖頭位於香港中產區，經常都會有好多家長幫襯，而當日就被一位家長受到不尊重對待。樓主指當日為呢位家長收銀，詢問要唔要膠袋時，家長竟然用「掟」嘅方式，將信用卡「掟」出嚟。

樓主指當時心諗點解可以喺個女面前咁無禮貌，收完錢後諗住件事都算，點知……

家長：「嗱！阿女，要努力讀書啊，唔係大個就會好似呢個姐姐咁㗎喇！」

不過身為著重「好客之道」嘅香港售貨員，當然只能喺心裡咒罵，樓主心諗：「咁睇唔起sales，就唔好出嚟買嘢」，又話「最慘係個女畀佢灌輸曬啲錯嘅價值觀」。

港媽超市內教女唔好做理貨員

其實早在兩個月前都有類似投稿，有做超市理貨員嘅網民指有港媽帶同囡囡行超市，過程中同囡囡嘅對話令網民嬲爆！

網民指有日同同事喺舖頭執貨架時，聽到有細路女問媽媽：「呢兩個姐姐喺到做啲咩啊？」

港媽：「呢兩個就係啲執貨嘅人，要搬搬抬抬好辛苦架！」

網民就話聽到呢到都正常，唔想出聲，點知跟住嘅對話先乞人憎。

妹妹：「點解辛苦嘅？」

港媽：「因為呢兩個人讀書唔成，所以要做埋晒呢咁下賤嘅工種，要喺度執埋晒啲狗屎垃圾，你大個要孝順我啊，唔好似佢地咁啊知唔知？」

網民聽到嬲爆，表示做呢份工養得起自己同父母，完全對得住自己，而非港媽口中所講嘅下賤。

於是網民就同同事大聲扮傾偈：「我哋喺度執緊垃圾，咁入嚟嗰啲係咩人呢吓？」

同事：「嗰啲咪就係入嚟揀垃圾囉，我地袋住人工去執啲狗屎垃圾，慘過有啲人仲要畀錢買啊陰功。」

港媽聽到呢番說話後，不禁大鬧「你哋呢啲咁嘅人識得啲咩啊？」而同事都忍唔住回應對方係怪獸家長兼玻璃心。

不過港媽都唔執輸，以「抵你成世打呢份工啊！做埋晒呢啲低級工種！」回敬。網民就表示「真係咁高級就唔洗幫襯我地呢啲貧民窟啦！」

事件喺Facebook發布後，得到大批網民鬧爆港媽「唔識尊重人」、「狗眼看人低」，「做緊大學去超市做兼職好正常」等等，亦有人擔心事件中嘅囡囡大個咗會變咗阿媽咁野蠻。