權威人士發言A股例跌 究竟佢講過啲乜？

人民日報日前就於頭版刊登 《開局首季問大勢–權威人士談目前中國經濟》，佔版面成三分一，真真正正位於核心內圍。

到底「權威人士」係乜水先?外界對呢位「權威人士」的真身一直爭議不斷，有人話佢係人行行長周小川，又有人話佢係內地保監、銀監與證監的領導層，更加有人突破盲腸話係習大大。其實佢係邊個都好，但佢每次出場之後，個市都好似食錯嘢一樣……….瀉瀉瀉瀉不停。

原來計埋今次，「權威人士」已經係第三次出現。「權威人士」第一次的出現，係2015年5月25日的《五問中國經濟》，當時佢講到內地的結構改革與經濟分化等問題，最最最重要就係話未來增速回落是內地經濟進入新常態的一個重要特征，但只係階段性變化，慢慢會好起來。

第二次是2016年1月4日的《七問供給側結構性改革》。話比大家知，內地一眾領導人正努力改革，為經濟發展作新嘗試，一眾國民要畀信心國家!中國會好起來的!

第一次出場後，上海證券綜合指數當日大漲3.35%，升上4,800點。但半個月後就慘遇股災，滬指在約兩個月內暴跌2,240點。第二次出場後，滬指更是未能阻擋當時的頹勢，由刊登當日開市3,536點，跌至1月底最低2,638點，不足一個月就跌入谷底。

咁今次佢第三次出場咪…….小編唔敢諗。

咁今次「權威人士」講左啲乜？全文實在太長，字又太細，又係簡體字，所以小編精選幾個重中之中的要點，一齊用我們都明的語言分析一下。

原文﹕「经济运行的总体态势符合预期，有些亮点还好于预期。但经济运行的固有矛盾没缓解，一些新问题也超出预期。很难用“开门红”“小阳春”等简单的概念加以描述。 」

港式翻譯：
為望落盤數因有自信所以美麗，前幾年預測時用咗少少中國特式方法，所以總體經濟是符合預期的，某幾個位仲好過預期!不過，內地經濟依然帶著矛盾去運行，再加埋新問題，真係問題天天都多，「開門紅」、「小陽春」呢啲用詞唔岩用啦，可能要創作多少少中國獨有用語先可以解釋。

原文﹕「综合判断，我国经济运行不可能是U型，更不可能是V型，而是L型的走势。这个L型是一个阶段，不是一两年能过去的 。 」

港式翻譯：
U型同V型都唔夠型，祖國用得的都是天下第一!L型呀!L夠型!唔似U同V咁會轉彎，而係插咗落去就唔再上返嚟。L的直來直往就好似我愛祖國的心一樣，唔係用一兩年計，而係永恆不變。唱淡?我冇，唱平啫。

原文﹕「“退一步”为了“进两步”。我国经济潜力足、韧性强、回旋余地大，即使不刺激，速度也跌不到哪里去 。 」

港式翻譯：
「退一進二」呢個巧妙的前進技巧，好比家燕十字步。你以為佢郁左，其實佢郁右；你以為退一步進兩步，其實最後都只係進一步。

不過咁，有錢就是任性，內地經濟潛力大，磨擦力特強。只要人民充滿信心，再加埋黨只會唱旺所帶來的空間，分分鍾一個轉身嚟個小陽春。

原文﹕「对一些经济指标回升，不要喜形于色；对一些经济指标下行，也别惊慌失措。 」

港式翻譯：
當你見佢升，唔好開心太早；當你見佢跌，你都毋需害怕，因為低處未算低。如果你身為一個講股佬，你好有信心預測佢升，仲天真到以為你瞓身比晒佢，佢會回應你的心；但最後佢辜負天下少女心，仲跌勢唔止時，你就可以用呢句名言同投資者解釋返。正所謂，「蓆唔怕踩，最緊要割得快」。

講咁耐，「權威人士」都只係想表達，內地未來經濟都會穩定處於低水平，大家要努力撐住呀!

你可能有興趣的文章：
【邊個先係山寨貨？ 國產貨版權勝訴案逐個數】

http://www.edigest.hk/Vip/detail?id=2693

【香港另類搵食「工」略 劏豬、餵雞、水手、通渠有前途？】
http://www.edigest.hk/Vip/detail?id=2666