想等樓市跌50%然後入貨 網民：到時你份工仲保得住？｜網民熱話
等樓市減5成上車
唔少網民都表示樓主妄想太多，仲未搞清楚樓主會係買先嗰個，定係已經供完樓的業主再買先。另外亦有人提到未過五成，政府已減辣。
好多人都提到跌30％都好夠，不過都有網民同樓主企同一陣線，跌唔夠50％決不會買。有人反問佢哋：「4成就反彈咁點算？」
「我嘅目標係100% 」
「我目標200%, 賣家要貼100%樓價cash加層樓我先會要」
有網民提到跌5成的話，要一次過入2個太古城2房單位。有人回應要搵都搵啲新樓，太古城啲舊樓畀都唔要。不過亦受一部分嘅網民歡迎：「大古城啲舊樓都超過一千萬，比我一定要!」
樓市跌4成已到居屋價
另外有人提出，跌4成已到居屋價，唔使抽即入市。亦都有人發表意見指，有公屋住真係唔怕等。不過唔少人反駁，如果有公屋住嘅就唔洗嘈要買樓。提到就算聽日先入表抽公屋，慢慢排，排到你上樓樓價都未跌5成。
有密切關注樓市嘅網民指，根本就係假反彈，提到最叻果班係啱啱2017年聞到貿易戰味嗰班業主，跟住依家嗰班業主學人反價，逃生門又關咗。
「一有少少情況，啲牛鬼蛇神出晒嚟，真係好好笑，好睇過華為單嘢。下下都等跌，有實力洗X等咩。 」
「香港人講就凶恨，做就⋯⋯樓市升就話好貴好高買唔起，到個市趺又話睇定d……好老實講機會錯過就無
香港樓價返唔到轉頭，只會系咁升嫁咋」
等跌5成根本係恨買樓到傻咗
好多人表示跌一成都大把人追入，仲想跌五成，直頭係諗太多。香港咁細嘅地方 想佢樓跌得多都難。
「老實講
如果跌到兩成
好多人會X衝入貨」
「成也辣招，敗也辣招，跌三成銀行系統都唔會有事。」
「大摩話中美貿易戰若果持續，全世界經濟衰退，利率會跌到零，即係話供樓唔使比利息，不過樓價跌到一蚊一呎。」
另外有人分析，指香港私樓根本會跌到你負擔得起，經濟唔好，連嘢都冇得撈，唔好講買。再講買咗樓如果唔好彩跌咗，其實每次都會升返冇問題。但係如果香港嘅獨特優勢被人拆咗後，就唔同講法。
有人假設個樓市跌，到時大把業主封盤。唔會有人會個市差出貨，啲業主都唔係傻，要出貨，呢兩三個月高位已經出咗貨，貿易戰已經唔係咩新鮮事。
「好似連幫我屋苑倒垃圾個阿姐都話貿易戰好大獲，到時會少咗好多垃圾倒，分分鐘會無垃圾佢倒，咁佢就無得撈」
「跌5成既時候你肯定銀行會借錢比你？你份工保得住？」
