「極品新娘」奇招要求全部同事畀人情 結完婚繼續向上司追禮金 公開同事送禮銀碼
廣告
收到「紅色炸彈」，就算未能出席婚宴，正所謂「人唔到禮到」，不少人都會送禮、畀人情，祝賀一對新人。不過，日前有網民卻指遇到「極品新娘」出盡法寶「R人情」，無論是派帖後、結婚前夕，甚至是婚禮結束，該位新娘亦用盡方法收人情，令該網民大感不滿。
撰文：經一編輯部 ｜圖片：公務員secrets、Unsplash
「極品新娘」追人情 連婚禮結束後都唔放過？
日前，有網民於Facebook專頁公務員secrets發文，投訴遇到「極品新娘」。該網民表示，那位新娘在無問過公司同事會否出席酒席的情況下，向全公司同事派帖，甚至連入職不足一個月的同事亦不放過。
派帖後，該新娘便會私訊同事，問會否出席婚禮，若對方無法出席，她便會提醒對方「畀人情」。就算同事夾份送結婚禮物，「極品新娘」不但查禮物價錢，甚至在社交平台上公開銀碼，之後再用其他招數追同事畀人情。甚至在婚禮結束後，追上司畀人情。
網民：要幾厚面皮先做到？
該帖文一出，雖然有網民認為收下喜帖後，就應該預要畀人情，又有人指「去飲呢正常嘅價係$1,000，唔飲呢正常嘅係$500，例牌」。不過，不少網民認為該新娘的做法厚面皮、寒酸，更有人指「無錢就唔應該結婚」。
- 「塊面皮有幾厚先做得出。」
- 「其實結得咁肉酸，周圍去R 錢同街邊乞丐有咩分別？」
- 「人情同禮金都唔識分，仲要結婚擺酒，派一張爛鬼餅卡，就好似成村人欠咗佢咁， 冤鬼纏身，沒有極品只有更極品。」
- 「係咁問人拎人情其實係咪真係咁等錢使，咁窮唔好結婚啊嘛。」
- 「其實送禮係心意啫，最憎人去check人哋送禮物既價錢。唉…呢啲人入報紙落去都廢事。」
網民：婚禮唔係邀請人哋嚟畀錢你
又有網民認為該新娘的行徑違背婚禮的本義，表示收人情是其次，最重要的是邀請親朋好友慶祝喜事，而該新娘的做法本末倒置。
- 「其實真係唔明，又無人要你搞婚禮，搞完又問人攞錢。一係就大方啲請人去婚禮，大家都開心，無錢嘅話就唔好搞咁大型，請身邊啲朋友咪算。」
- 「其實我一直都唔明，話明結婚係請大家去飲，『請』嘅意思乜唔係自己搞掂哂啲使費㗎咩？等於你話請大家飲茶，你會唔會叫大家夾錢？！點解要外人填你哋筆數？無錢就咪鬼結婚。再難聽啲講句，又唔見啲人離婚時還返啲人情。」
「婚禮本義是邀請親友、好友，要感激多謝的人嚟戥你高興，點解要R人情，R到人哋神憎鬼厭。理論上唔應該收人情，佢想嘅，自然會畀，豐儉由人。『成件事係邀請人哋嚟畀錢你』，唔係婚禮。」
網民教路 直接話下次再畀
有網民坦言，再遇到「極品新娘」，應直接拒畀人情，甚至一開始不應該收下請帖。
「如果同佢真係唔太熟，畀帖嗰下直接推佢唔收，講明唔得閒再補句「我真係恭喜你呀」，掂都唔好掂張卡。如果女同事係放枱頭走人，我放返去佢枱頭。
- 「將餅卡入返落利是封當人情畀返佢啦！」
- 「封返份蘋果日報畀佢。」
- 「畀返餅卡錢50蚊算打和。」
又有網民教路，笑言收到這類「R人情」的訊息，可以直接回覆「今次唔得閒嚟，你下次再結婚前再問我，睇吓夾唔夾到時間」、「人情嘛，下次畀雙份」。
