月子餐DIY 唔洗100元搞掂

小編做過資料搜集，發現坊間的月子餐好多都強調要進補，話產後媽媽身子變差，要用珍貴藥材補一補，價錢都唔平，一日兩餐動輒每日逾300元，一個月隨時成萬元支出，真係未出月減磅，個荷包已率先瘦身!

其實香港中文大學婦產科學系副教授譚永雄話，如果過量進補，分分鐘肥返落媽媽度架，唔係話進補就百利而無一害，反而均衡營養先可以更加好咁調理身體。

想食有營養嘅月子餐，又係咪一定要訂購月子餐?自己做得唔得呢?兒科專科註冊營養師梁慧思表示，產後飲食只要奉行健康飲食金字塔就得，唔洗跟特定餐單。準媽媽 可以食紅米，糙米 甚至係依家流行嘅泥麥，增加飯嘅鐵質含量；又應該食用多種類的肉，尤其係紅肉，至於菜就建議選擇一種綠色及非綠色，一餐有兩種菜就可以啦!

而餐與餐中間都可以加一些健康小食，代替產婦比懷孕前要多吃嘅五百卡路里，例如水果或者乳酪 ，又可以加水果作天然調味。(詳細訪問內容可以睇片)

根據食物安全中心，18歲至29歲女性一天需攝取1900卡路里，產婦要再多加500卡路里，即平均一餐要有800卡路里。而小編根據營養師嘅建議，係咁易設計一個自家製又健康的月子餐單，有菜有肉兼有乳酪生果，一餐花費都不過係75元，每餐係咁易轉下食材，轉換唔同嘅蔬菜同肉類，或者係小食，又可以係另一餐，同樣午、晚一日兩餐，都只不過係150元，一個月5,000元有找，比坊間月子餐平起碼一半。仲唔怕有味精及唔乾淨，真正食得有營兼夾抵。