月入$15,000慳妹 唔靠父幹 大把錢剩

撰文: Jackie

1 自己煮好嘢俾自己食

依家出街食飯好貴，想食得好，不妨買料返屋企煮。好似食餐打邊爐，如果想有番啲質素，喺餐廳食要200蚊一位；喺街市、凍肉舖買，除番開每人都係100蚊左右，即刻慳返一半。或者買塊牛扒加一支紅酒，同情人喺屋企燭光晚餐，佈置得靚一靚，相機食先再放上Facebook放閃，一定唔輸俾出街食。

2 準時起身  少搭的士

賴床搞到遲咗出門口，為咗唔遲到惟有搭的士返公司，尤其冬天嘅時候，更加唔想同張床分開。不過日日搭的士，無論公司離屋企遠定近，都一定比搭公共交通工具貴，每個月就要額外用一千幾百元落交通費。所以如果做到日日準時起身，唔洗搭的士，年終都慳唔少。想逼自己準時，可以試下制訂獎罰計劃，如果全個月都冇搭過的士，就可以去食餐好嘅；因為遲到而飛的，每次入返$50落錢箱。

3 分開儲蓄戶口 消費戶口

如果成份糧入晒同一個戶口，提取冇節制，啲錢好容易又用光光。開設2個戶口，一個用嚟做日常消費，攞錢、找卡數都係呢個戶口搞掂；另一個戶口就係淨儲蓄，自己制定每月出糧之後，放幾多錢入儲蓄戶口，三成又好、五成又好，入落呢個戶口嘅錢就唔再郁，直到儲到一筆錢，再將部分資金撥去投資。

4 諗清楚先好買

有時返工壓力大，好想瘋狂購物去填補弱小心靈，「買買買係咁買，買完返去擺」，衝動購物買到一大堆根本無需要嘅嘢，但錢就用咗喇。如果真係有想買嘅嘢，就寫低佢，一個星期之後睇下自己仲想唔想要，諗清楚先至好買，咁就唔洗用咗冤枉錢。

5 善用信用卡積分換禮品

首先，用信用卡之前，一定要確保自己有還款能力。只要你有自制，用信用卡都未嚐唔係一件好事，因為喺某啲餐廳用特定信用卡可以有額外折扣，仲可以儲積分。儲滿一定積分，可以換現金券或禮品，例如一杯免費咖啡，減輕少少日常洗費。

6 留意大減價、網購優惠

多啲留意Outlet、大減價嘅時候，好似一件Topshop嘅外套原價600元，半價只需300元，真係慳唔少。尤其最近乍暖還寒嘅天氣，遇上轉季大減價，個啲七折、半價嘅冷衫仲著到幾個星期。仲有依家有好多網購節日，例如「雙11」、「Black Friday」、「Thanksgiving Day」，當中提供嘅折扣真係幾吸引，有心水產品就忍手忍到呢啲網購節先買。