月入萬幾蚊一族 是苦是甘自己知 | 網民熱話 | 在職貧窮
廣告
文：浩德
如果你以為有工返，總好過冇工返，咁呢個諗法，就真係大錯特錯。須知道呢個世界上，有一樣嘢叫「在職貧窮」，既要返工做嘢辛苦，同時又要捱窮，相比起失業待業在家更慘。近有網民就大呻：「月入萬幾蚊嘅嗰班人，係全香港最慘嘅打工仔！」
支持呢個說法嘅理據如下：
1. 在職貧窮：申請公屋唔夠資格
根據現時公屋的基本申請資格，家庭人數一人入息及總資產淨值限額分別為$11,250及$245,000。如果你搵緊12K，Sorry！你已經超過申請一人家庭入息淨值限額上限喇！拜！
2. 在職貧窮：私樓一世儲唔到錢買
香港樓價有升無跌，今時今日所謂平價的上車盤，約200實呎的舊樓都過300萬。當搵緊3幾萬蚊人工嗰一群都大嗌上唔到車之時，試問一個搵萬零蚊嘅打工仔，又點可以買到私樓呢，簡直係天荒夜談啦！
3. 在職貧窮：保險無錢供
當每月份糧都唔夠個人基本生活費，每日返工嘅車費、飯錢，電話費都要計過度過先用嘅時候，莫講話再用額外錢嚟買保險，差啲就連睇醫生錢都未必畀得出！
4. 在職貧窮：搵唔到女朋友
雖則話拍拖最緊要係「兩情相悅」，之但係唔係有情就真係可以飲水飽嘅，當自己都差啲淨係得水飲嘅時間，就無謂累其他人要陪你飲水啦，嗚！
5. 在職貧窮：父母嫌家用少
仔女有收入，畀家用父母係天經地義嘅事，但係搵得雞碎咁多，又真係好難畀得多父母。與此同時，父母嫌家用唔夠亦都係人之常情，始終燈油火蠟樣樣都要錢，兩難呀唉！
不過，正所謂：「寧欺白鬚公，莫欺少年窮！」雖然你現時可能只有萬幾蚊收入，但難保機會話嚟就嚟！只要自己唔放棄自己，努力工作、不斷進修自我增值，總會找到理想出路！
