最廢聖誕禮物 你收過幾多份？

小編收過「廢物三寶」（包括相架、水杯同萬年曆）已經好嬲，但原來沒有最廢，只有更廢。有聽過朋友話收蠟蠋、壞既叉電線、睇過的舊VCD⋯⋯

以下係小編綜合了自己兼身邊朋友、同事的經歷，綜合得出來的最廢禮物，大家是否認同？唔認同可以隨時修改架﹗

相架、相簿

依家都數碼化，仲有幾可曬相？送果個有冇諗過架！仲要又大件又重又難收藏，家居垃圾又多件！

水杯

水杯其實一個就夠，小編又唔會亂發脾氣打爛水杯，真係好難搵藉口換杯。年年都收到，唔知用到幾時，咁咪一路擺起屋企囉！

聖誕帽

邊個會戴出街呀？依家扮聖誕老人咩⋯⋯

萬年曆

一個萬年曆已經可以用萬年，照計都應該冇咁長命，咁你仲送黎做咩呀？！仲要每個月都要砌過，你估個個都咁得閒咩！

零食盒

有得食都唔算差，之不過好多時買的零食都未必合自己心意，若然自己減緊肥，就只有將個零食盒貢獻返出黎畀其他人分，結果有禮物等於無禮物。

過期雜誌/舊書/舊漫畫/舊VCD

呢個真係嬲，你話買啲新出既都話有得睇下，你拎屋企啲陳年雜誌、Fasion仲係喇叭褲時代黎送人，好意思咩？！

至於啲愛情小說、迷語書、說明說、教科書，就要拎去回收。殘舊VCD？唔係嘛，呢個世代仲有機播到架，睇啲影片格仔都睇到眼花？仲要啲VCD封哂塵，真係抵俾人鬧！

筆、文具

以前啲人送筆就話好大體，但家陣社會全部轉哂電腦化，個個都whatsapp、email，唔係學生的話，都真係冇幾可會用筆寫野。你畀支幾貴的筆畀我，都係無用武之地架。最經典係有人試過係筆上面見到印左公司名，擺明公司紀念品，收到除咗「啤」一聲之外，真係冇嘢做到。

至於小編仲慘，試過收一盒萬字夾，我覺得一世都唔會印咁多紙黎夾，依家仲係原封不動放係屋企。

自畫像

小編真係收過一幅畫得好核突的畫（一堆火柴人，你話藝術真係唔識欣賞）。又有人自己影咗幅相然後簽名，話第時佢發達去搵佢，以相為證喎⋯⋯Well⋯⋯小編真係不幸。

玩具

相信貴為爸爸媽媽的人，不時會收到送畀自己小朋友的玩具作為聖誕禮物。「喂喂喂，家陣你送禮物畀我，唔係我仔女呀。」小編雖然未婚，都聽過一啲已婚的朋友咁講。

咁又講真，你又唔知人地個仔女鍾意玩乜，而且依家啲家長好緊張自己仔女嘛，驚啲玩具對仔女有危險，唔會畀佢地玩，過多幾年仔女大哂，到時又唔玩，最係又係一件廢玩具，製造垃圾。

寵物糧食

同送玩具一樣啦，家陣送畀人定貓狗呀？又知我啲貓貓狗狗啱食？送小食都仲好啲，有人竟然送成包糧過黎，一包都成幾KG，拓返屋企都幾金。