星級投資王

其實趙薇同佢老公黃有龍係股場上都唔係第一次有斬獲，去年12月，兩夫婦斥資近31億元入股阿里影業(01060)，隻股由個幾炒到上差不多5元，就係今年4月差不多最高位就合共減持2.56億股，短短幾個月就獲利近6億元，出手真係快狠準呀。

除趙薇之外，其實仲有唔少名人都係星級股民，不過都有唔少損手爛腳話怕怕，究竟邊個有眼光，邊個係「明燈」呢？

開估啦﹗

講賺錢先，唔少影星名人都會大手買入或者趁低吸納，所以都賺唔少架！

范冰冰

范爺係2011年4月大手買入唐德影視，持有約129萬股，每股成本約為2.3元，
截至週五(11月20日)收市，唐德影視股價77.88元，勁賺過億。

麥玲玲

玲玲睇相叻，估唔到炒股都咁叻。玲玲話上市時已經認購港交所(00388)、港鐵(00066)，亦通常等大跌市執平貨，放係到收息。2012年時計帳面，股票戶口已經升左40萬至50萬。

蘇民峰

睇風水買股唔知係咪真係靠得住，不過蘇民峰係年頭曾經預告要8月8日前沽哂啲股票，佢就醒啦係高位已經放左手頭上三份一股票，賺到笑咁話。

章子怡

章子怡媽媽李涿生係08年收購萬達商業地產(03699)900萬股，之後增資擴股至1,800萬股，2014年12月萬達係香港掛牌，當時章子怡家族身家升到七億元咁多。

講完賺錢，當然唔少得蝕錢啦，不幸遇上股災走唔切，真係聞者傷心！

謝霆鋒

謝霆鋒去年10月以1.23億元入股漢傳媒(00491)，持股3.5億，原本股價一直急升，但係大跌市時回落，截至週五收市報0.415元，相比最高位1.36元，謝霆鋒身家蒸發逾3億元。

莊思敏

莊思敏話8月時股災走唔切，損失左七位數字，所以要密密搵銀，搞到佢最近都要拍個好惹爭議的廣告，大家睇開啲啦﹗

林盛斌(Bob)

阿Bob做主持就叻啦，不過講到股票佢就話怕怕。大約09至10年，佢聽聞有貼士，買咗隻仙股，結果蝕20萬至30萬元！所以話，真係要做下功課留意個市呀！