新三板奇葩 要幾騎呢有幾騎呢

【停一停，可唔可以講返人話? 咩係新三板呀?】

是咁的，新三板全名係「全國中小企業股份轉讓系統」，係國務院批準設立嘅全國性證券交易場，由全國中小企業股份轉讓系統有限責任公司負責運營管理。

要喺新三板掛牌可以話無難度，只要符合以下條件：

1.存續滿兩年。有限責任公司按原賬面凈資產值折股整體變更為股份有限公司，存續期間可以從有限責任公司成立之日起計算；

2.主營業務突出，有持續經營的記錄；

3.公司治理結構合理，運作規範。

「零．財政門檻」、「零．資產審查」、「零．收入標準」。簡單嚟講，只要你係一間正常運作緊嘅公司並且未來會繼續做，就可以申請上新三板。

新三板在內地Hit到爆，甚至連上市敲鐘都要排隊。就好似有新三板「草莓第一股」之稱嘅湖北草莓種植企業「勤勞農夫」就好勤勞咁等咗成個月先可以掂到個鐘。 喺一個咁美好的環境下，各類奇葩簡直係盡情咁大方異彩。

　　
等上板
翊翔文化公司

翊翔文化你可能未聽過，但冥通銀行你實有聽過。冥通銀行「母公司」，即係翊翔文化已經申請咗喺新三板掛牌上市。公司表示：「正開發建設基於互聯網的傳統民俗應用，利用互聯網推廣民俗。」

翊翔文化成立於2009年，前身是一家紙塑公司，直到2015年6月更名。產品為冥幣，祭祖系列、拜神系列等四大系列、多達200幾種產品，主要銷往新加坡、馬來西亞和香港。

呢間公司真係好有良心，解決陰間金錢問題，仲解決埋一班想賺錢嘅陽間人，真正做到陰安陽樂。大家好期待佢如何「利用互聯網推廣民俗」，在真正有答案之前，或者可以重溫返之前本刊的拓展大計建議:http://www.edigest.hk/Vip/detail?id=1833

搓澡堂子

2015年11月16日，西安真愛服務事業股份有限公司喺股轉系統披露了公開轉讓說明書。旗下搓澡堂子準備掛牌新三板，主要業務是——洗浴。沖涼沖到上市，都咪話唔威威。

搓澡堂子母公司真愛股份主要業務包括居民服務、餐飲及娛樂等領域，業務鏈涵蓋了居民的洗浴、正餐及歌舞廳娛樂。呢間公司仲持有天王周杰倫開設的「真愛範特西KTV」85%股份。真愛股份2015年1至7月收入為1.8億元人民幣，凈利潤為1,254萬元人民幣，毛利率高達76.33%。至於點解澡堂可以上市…..可能用鑽石能量水掛。

已上板
飛博共創

當你仲笑緊沖涼沖上市時，原來早有公司玩微博玩上市。2015年12月11日，飛博共創喺新三板掛牌上市，公司旗下擁有「冷笑話精選」、「星座秘語」、「生活小智慧」等眾多賬號。呢間媒體公司「主營微博、微信等新媒體營銷的傳播實戰與創意」，而內容都係個啲飲飲食食行行企企濕平睇戲咁。

好多人眼中時下年青人淨係識玩電話，甚至有人話上網=Loser，呢間公司簡直幫一眾廢青出返口氣。公司依家有1.5億粉絲，手機APP用戶1,127萬。 根據股轉說明書，飛博共創2014年營收為1,912萬元人民幣，凈利潤為526萬元人民幣。

百合網

阿爺教落，唔做媒人三代好，但依家睇嚟網上媒人好易做。2015年11月20日，媒人公司百合網登陸新三板。公司同一般媒人公司冇咩分別，唯一唔同係佢踩埋入互聯網，提供線上線下婚戀交友服務。你諗吓，中國咁大，識上網真係識多好多好多好多人。

截至 2015年 7 月 31日，公司線上累計注冊用戶數達 8,960 萬人。但當你對佢滿心期待就出事喇。百合網2015年1至4月收入為7,388萬元人民幣，但就錄凈虧損為13.53萬元人民幣。而且喺2014年同2013年公司凈資產餘額都係負。

百合網解釋話，唔關佢事㗎，係因為公司廣告營銷費大、公司又持續進行業務改革。但反觀佢同行，世紀佳緣，2015年第三季度凈收入1.827億元人民幣，增長13.1%。真係好難唔令人懷疑百合網啲人唔夠美麗囉。不過放心喇，喺12月7日，百合網宣布收購世紀佳緣，睇嚟今後都係百合嘅天下。

【唔夠怪? 得，你等等。】

1. 阿波羅
唔係香港嗰間，呢間係來自上海高新技術企業，公司話致力開拓高端泵產品。

2.海明威
冇老人，都冇海，得天才小漁郎。公司主要業務係線輪同釣竿的研發、生產與銷售。

3.哥倫布
前世哥倫布發現新大陸，今世哥倫布係商業地產行業嘅第三方服務提供商。

4.去吧看看
呢個真係估佢唔到，原來係做糧油批發零售。