學好英語 同外國人鬧咬都霸氣啲
雖然我哋做得銀行，好多人英語水平都一般般。而呢點我認嘅，第一個舉手。
除咗我之外，分行嘅黑仔王RM英語都係半桶水。雖然佢外表似Uncle Siu，把聲都有啲似，但真係英語有限公司。
話說有一次，有名你叫「黑仔王」，佢無啦啦接咗個外國客Dino。
開頭佢同Dino傾得好哋哋，唔知點解無啦啦得罪咗Dino啲咩，阿Dino突然高八調大鬧黑仔王RM，又擲凳，仲想反枱 (如果張枱反到嘅話)。只見Dino情緒缺堤，不停叫囂「I’m the Boss！I’m the Boss！」仲不斷表示要見老闆。最後老闆當然用360度鞠躬解決咗佢，而Dino亦大方地表示會close晒啲accountsss咁啦。
後來，由老闆嗰度得知，原來係言語間有誤會得罪咗阿Dino，搞到佢覺得黑仔王RM唔尊重佢，然後啲嬲嬲谷晒上條頸，先咁大口氣。所以話，如果向的士大哥學好英語，應該可以霸氣側漏咁反駁：「I don’t care you are a boss! You are not my boss! 」
至於小妹，都有曾經因為英語唔夠好而未能同鬼佬開火嘅經歷。眾所周知，灣仔駱克道有好多間酒吧，成日好多菲裔女人喺入面搵食。可能係文化差異引致嘅飲食習慣不同，中午Lunch流流啲鬼佬都會攬晒女，飲晒酒咁嘅，我每次經過都八卦望一兩眼。
啊點知有一次中午經過，喺一間酒吧門口比個飲到醉昏昏嘅鬼佬用枝酒樽截住前路，跟住講咗句「Hey Sweetie, xxxxxxxxxx?」由於小妹未學好英語，聽唔清/ 聽唔明/ 唔知佢講咗句咩，就急急腳走佬。
咁走還走，我好有危機意識，邊逃邊用眼尾睄佢，幾驚佢突然惱羞成怒用酒樽扑濕我！好彩，最後佢係一面黑人問號，再做咗聳肩呢個姿勢，一路用死魚眼含情默默咁望住我背影直至完全消失。而家睇完的士大哥教學，學咗一兩度散手，覺得當時應該可以咁樣樣回應：「 You block my way! 」
身為飲香港水、流香港血嘅港女，學班港姐話齋，要致力捍衛「世界和平友愛」。為咗可以同外籍人士更好地交流切磋文化，學好英語係重中之重！
作者簡介：
溫柔，九十後銀行前線女職員，
幻想自己是銀行家，現實上為跑數妹。
上至銷售投資理財保險產品，下至開戶申請貸款信用卡，全部一手包辦。
畢業於四大商科，高不成低不就，終日銷售，為一萬幾千折腰。
於 2016 年開設 Facebook Page「90 後銀行小妹甩轆記」，
分享每日在分行上演的奇趣事、遇見的瘋狂客戶和職場點滴，引起不少讀者共鳴。
作者今年剛推出新書《銀行小妹甩轆日記》
新書簡介：
★ 90後銀行職員瘋狂洩密，甜酸苦辣，一書包辦！
★ 60篇銀行前線滑稽實錄！
★ 無論身家一百蚊定一百億，出世開始就避唔開理財！
【同行、客戶均有共鳴！】
存款、投資、借貸、定期⋯⋯升跌賺蝕！梗關你事！
◎瘋狂客戶特輯
－非VIP都可以排Premier條隊？
－用JM Tone開戶口會著數啲？
－分行有《奪命金》真人版上演？
◎職場甩轆日常
－Banker原來只係Sell禮品？
－「開戶三寶」係邊三寶？
－情侶開聯名戶口有詛咒？
◎銀行前線二三事
－銀行職員唔同崗位有乜分別？
－想投身「銀行孽」有冇捷徑？
◎節日限定合集
－銀行掛曆利是封免費任攞？
－生日可享Premium服務？
