揸的士賺辛苦錢 5大冤屈逐個呻

1. 客人將加價矛頭指向我哋
啲客成日話我哋係咁加價，講埋哂啲咩「賺唔少啦」、「過肥年啦」咁嘅說話，其實真係好難聽！你哋班客仔知唔知加完價唔代表司機有得賺架！司機都要交車租架嘛！日日嘈冤巴閉要加價嗰啲叫車主唔係的士佬呀你哋訓醒未呀！呢頭加完價佢哋咪加你車租囉！總之富者越富，我哋班的士佬就照舊好喇，食得鹹魚抵得渴，做吓擋箭牌又唔洗死嘅！但依家你哋知道，就鬧多啲班車主煩少啲我哋啦，唔該！

2. 交更艱難變相又賺少咗
交更前要入足氣畀下更，但啲氣價間間唔同，平嘅九成排哂長龍分分鐘等成半粒鐘先入到氣走得，所以唔係我哋啲的士佬唔想做你哋生意呀，而係準時交更越嚟越難呀！真係唔好彩我準備交更你話要過海，咁我咪要倒蝕畀你囉，所以你班人唔好諗住自己一定係畀緊錢我賺先得架，你哋分分鐘害緊我哋呀！遲嗰少少，代價大大呀！

3. 唔載短途的迷思
其實短途好好做嘅，一單接一單就最happy添啦，但係先生小姐，你哋要坐短途就唔該醒少少出大街截啦，我喺的士站排咗咁耐先到我有客，你竟然同我講街口有落？七老八十或者行動唔方便都算啦，但你剛剛跑過嚟的士站打尖架喎？隔離又咁多綠的無人等，你做乜係都要畀多幾蚊我先！阻人接大旗！

4. 塞車時間嘅過海恐懼症
老老實實，明知塞車時間仲要截的士去係咩心態？你搭得的士都係貪快架姐，都話埋畀你知快唔到咯，咁做咩要搭的士先？你搭個港鐵都快啲而且畀錢又開心啲啦！你哋以為塞車都錶照跳我哋就實有賺架喇咩？塞半個鐘，我都係頂多收多你30至48蚊，但呢半個鐘阿叔都唔知可以跑多幾多個二百米啦！塞車時間走嚟過海仲要貪平行紅隧，損人不利己咋！

5. 怪客萬千
唔好講怪住，講CHEAP客先，三四件大行李，死都唔肯擺車尾箱方死蝕底咁，仲有嗰啲下下叫人車你去差館告你拒載嗰啲呀，死要面又係損人不利己，快快脆落車截過架好過啦。凌晨喺老蘭蒲天光嘅，真係嘔咗咪認咗佢囉，唔好側側膊又嘈冤巴閉唔肯畀清潔費，阿叔唔係老鳳幫你執手尾架，你玩到咁就唔該傍水啦。阿叔夜晚走嚟車你班醉貓痴漢，分分鐘真係要搵命搏，你班友仔癲起上嚟又話要殺阿叔、又話阿叔奪你貞操咁，渣多幾轉你啲人都好易神經衰弱！

你班網民成日話我哋啲的士佬點點點，淨係睇到自己有幾唔方便，但有無諗過呢啲唔方便其實係有錢嗰班同佢哋定落嚟嘅制度玩嘢先搞到咁！你哋班人就成日當我哋呢班的士佬係箭靶日插夜插！我哋有苦真係自己知，希望你睇咗呢篇苦水後對的士佬有返多啲體諒唔係一味喺度插！