2018換新智能身份證 影靚相4大注意 | 防偽特徵 | 網上預約
廣告
【2018新智能身份證】政府於今年底推出新智能身份證，相信如果上一次拎身份證唔合自己心意嘅你哋，係咪已經開始諗定點影張靚相先最perfect呢？新一代智能身份證上，相片面積會比現時嘅大三份之一。唔少人都好注重身份證上相片嘅效果，咁點樣先可以影到一張合心水又合乎要求嘅相呢？
文：Cheryl
尋日入境處助理處長陳天賜就出席咗電視台節目《講清講楚》，教大家幾項影新智能身份證要注意事項：
新智能身份證 影靚相4個注意位
- 避免帶很深色嘅眼鏡鏡片、太陽鏡
- 避免頭髮遮蓋面部或眼睛
- 濃妝並唔適合，各位女士化返個淡妝就可以啦
- 衣著方面，穿著有領嘅衫效果會更加好㗎
雖然助理處長表示著有領嘅衫唔係為咗比大家顯得瘦用，但亦提到因為身份證除咗頭以外，會見到部分上身，所以有衫領勾劃效果會好睇啲。
新智能身份證15年「壽命」
而市民換證時拍照嘅機會會多過一次，所以放心大家可以影到「滿意」為止！
今次換證預會喺第四季開始，預計2022年完成，需要更換約880萬張，比上一期換證數量多出約200萬張，新證「壽命」大約十五年，預計換證計劃提供大概216個短期職位。
新智能身份證7個不同
究竟新證又有啲咩唔同之處？
- 晶片容量為 80 kB，比起舊證嘅 32 / 36 kB高出一倍有多。
- 雙重介面 (1. 接觸式, 2. 光學閱讀+無線傳訊)
- 資料保安 BAC+PKI 密匙
- 防偽特徵更新及加強
- e-道過關時間比以往快4秒， 憑新證只需8秒就能過關
- 可網上預約及自助填表
- 可自助領取
另外，今次換證將會推出兩項便利長者嘅措施。有65歲以上長者嘅家庭，其實可以除咗自己換證之外，同時都可以帶埋同長者一齊去換證中心換證。
而另一個關愛安排，係會組成外展隊親自去到院舍，除了長者，一些殘疾人士、行動不便的，會上門協助辦理換證手續，唔洗佢地舟車勞頓咁辛苦啦！
