學費200蚊一堂的興趣班 原來只係Book場踢波｜Purple弟弟
撰文：Purple弟弟 ｜ 圖片：電視截圖、unsplash
其實，我都係對自己、對教育有要求，點解一直要用下限「有書讀已經好好啦」嚟做標準？
身邊所有人都要我學識「苦中作樂唔好搞咁多事」，或者就係呢種諗法導致我哋香港人比人恰到上心口都唔識反抗。
此地無銀Happy School
近年，好多學校大搞公關，冒出唔少自稱Happy School嘅學校 。
甚至有唔想小朋友太辛苦嘅家長，更加會參考區內有邊啲Happy School選擇志願。
我唔係話Happy School唔好，「少功課，無咁辛苦」當然係好事，不過多同少都係透過比較先知。
即係所謂「少功課，測考」，係「少」過香港地一般學校同名校。
說穿了Happy School只是正常些少嘅學校，其實小朋友使鬼做咁多功課！
只係香港教育太癲，佢哋先可以冠上「Happy」稱號！
正正係呢班Happy School嘅掘起，令我決心將來要自己小朋友讀國際學校！
試問一句，街市啊姐向你瘋狂重複咁講：「我啲菜又靚又甜，唔呃人架」，你會選擇買定係驚一驚，都係睇定啲先？
天價學費 讀大學都冇咁貴
咁決定咗想自己小朋友讀國際學校後當然要坐言起行，但一睇學費，就覺得不可思議！
想當年自己讀大學，都係3至4萬蚊一個SEM！
但而家講緊係小學，我強調多次係小學，大多數都係收緊10萬左右一年！出名嘅甚至20萬都嚟緊，都未計你有錢都未必入到！
大佬啊，唔好咁癲啦！我只係想將來個仔可以正正常常接受教育啫。
一年我當10萬，讀得國際學校都包埋中學，12年即係120萬，已經夠比細單位首期。
估唔到我唔單止要做「樓奴」，原來仲要做埋「供書」奴。
父母錫小朋友 商家利用到盡
好多人做咗人父母之後先知，商家佬專恰家長！
恰家長唔捨得使係自己身上，但肯使係小朋友身上！
啲童書啊，玩具貴到你想像唔到，想小朋友有一技之長？
興趣班收你200蚊一堂，其實只係BOOK咗個草地足球場，比十幾個小朋友踢下波。
金色陀螺
近期最深刻係我朋友個仔，最新鍾意咗睇一套卡通片。
咁睇卡通片人之常情，不過原來套卡通片係宣傳易啲廣告嚟，成場係到用隻金色陀螺秒殺對手，咁即係點？
即係我朋友個仔睇完嘈住要買陀螺囉！
去到玩具舖先知，陀螺都有人炒，朋友個仔想買果隻金色陀螺已經無得買，但其他陀螺都唔見得平，一隻都百幾蚊，但得一隻陀螺又點玩呢？
即係你仲要焗住買埋個陀螺盤同陀螺發射器，咁你成日人工就係咁先。
香港地，只係一個用天價買正常嘢嘅地方，唔想放棄做正常人？
首先就要癲咗咁俾錢先！
延伸閱讀：
今日人工得$12,000唔緊要 一定要學識「真努力」｜Purple弟弟
【今日人工得$12,000唔緊要 一定要學識「真努力」】有人話，現代人愈嚟愈悲觀，佢哋唔明白，嗰啲說話只係陳述句子，當中沒有帶一絲情緒。「樓咁貴儲十世都買唔到啦！」、「無父幹已經輸了，李嘉誠都係書香世家出生！」
撰文：Purple弟弟 ｜ 圖片：電視截圖、unsplash
以上都是事實，不過人的接受程度不一，有人接受唔到可能會出現反社會人格；
有人接受唔到，會想盡方法希望改變殘酷現實；
不過無論你係邊種人都好，認清問題的話，問題就解決咗一半。
如果你接受社會不公，出生家底係好重要，咁就希望你睇埋落去。
想成功絕不能不努力
相對於出生好嘅人，我哋呢啲平民學習環境比唔上人哋，父母教育程度亦多數不及有錢人，人際網絡同機遇都差天共地，而惟一有機會贏嘅只係「天資」！
不過即使你天生聰明過人，但窮黑馬始終難搵到伯樂。
聰明過人當然係好事，但因為人人唔同所以都無法討論。
條件差 人工只得$12,000
假如我哋天資平平，以上所有條件又係「投胎」問題，我哋控制唔到，咁答案其實已經浮面，你惟一控制到嘅就係努力！
你諗下人哋有錢又努力，你今日人工只得$12,000，條件已經差過人仲努力都唔肯，差距只會愈大，反之你努力過有錢人，即使得少少都好，總會有成果。
何謂「真努力」?
假如你認同縮短貧富差距係需要努力，咁你都要學識咩叫「努力」。
如果你出身基層，應該聽過父母不時同你呻，「我咁比心機將你養育成人」、「我咁辛苦供書教學」、「我咁辛苦打兩份工」諸如此類的說話。
其實好殘酷咁講句，呢種父母非但不努力，更加係懶！
唔肯跳出舒適圈
懶在唔肯思考唔肯跳出舒適圈。
所謂好努力，只係打一份工打足十年，無諗過點樣可以搵更多，比藉口自己乜都唔識，已經「做到最好」。
所以你會留意到好多四、五十歲嘅人都唔係好識用智能電話。
雖然佢哋日日手持iPhone，但點樣上網、點樣較靜音都唔了解，因為佢哋已經認定咗自己年紀大，係呢方面點都唔及後生。
即使係中文版面，好多嘢都係跟指示操作就解決到嘅問題，佢哋都會直接搵仔女幫忙，而唔係自己摸索一番先。
而真努力就係要改變呢種諗法，只要唔好自己搵個天花板檔住自己，其實自己可以飛更高更遠。
再具體一啲，就係要不安於現狀以及自律，為自己訂立更高目標。
訂立方向同計劃，再自律咁去按計劃執行就為之「真努力」！
如果仲係一味死做爛做，同隻牛有乜分別？
「隻牛係日日都好勤力，但係咪發到達？」
